«Արդեն երեք ամսից ավելի է՝ մոտ չորս ամիս կլինի պահանջում եմ, որ Մարդու իրավունքների պաշտպանը ինձ տրամադրի ինֆորմացիա ոստիկանության որոշակի հանցագործության մասին»,- Aravot.am-ի հետ զրույցում ասաց Վարդգես Գասպարին, որն այսօր պիկետ էր կազմակերպել ՄԻՊ գրասենյակի մոտ:
Ըստ նրա`ՄԻՊ արագ արձագանքման խումբը իր պահանջի մասին տեղյակ է, այդ ընթացքին հետեւել է, սակայն, մինչ այսօր իրեն չի տրամադրել համապատասխան տեղեկատվություն, ինչի պատճառով էլ`«Ես պահանջում եմ, որ Մարդու իրավունքների պաշտպանը չթաքցնի հանցագործության մասին ինֆորմացիան, որին ինքը տիրապետում է»:
Մեր հարցին, Ձեզ այսօր գրասենյակից ներս հրավիրե՞լ են, կամ ինչ որ բան պատասխանե՞լ, թե՞ ոչ, Վարդգես Գասպարին ասաց. «Ես գրավոր պատասխան եմ ակնկալում, ինձ իրենց մոտ հրավիրել պետք չի, ոչ մի ընդունելություն պետք չի, քանի որ դա ոչ մի տեղ չի ֆիքսվում: Ես միայն գրավոր պատասխան եմ ուզում: Երեկ ինձ պաշտպանի գրասենյակից զանգահարեցին, ասացին, որ արդեն ուղարկում են, այսօր կամ վաղը կլինի: Բայց մեկ անգամ էլ էր նման դեպք եղել, ինչ որ գրություն էին ուղարկել, պարզապես ուղարկելու համար»:
Կարդացեք նաև
Վարդգես Գասպարին նշեց, որ հստակ շարադրել է իր հարցերը, որոնք, ըստ նրա, հետեւյալն են. «Արդյոք ես օգոստոսի 23-ին զանգել եմ ՄԻՊ-ի 116 եւ 096 խմբին, արդյոք իրենք տեղյա՞կ են դրա մասին: Արդյոք ես ասե՞լ եմ, որ ինձ բերման են ենթարկել ու արձանագրություններ չեն կազմում: Արդյոք արագ արձագանքման խմբի պատասխանատուներն ասե՞լ են, թե հիմա մենք կապվում ենք ոստիկանության հետ, այդ հարցը ճշտելու համար: Արդյոք մինչեւ ժամը 1:04 րոպեն ես իրենց ասե՞լ եմ, որ ինձ այդպես էլ առանց արձանագրություն կազմելու, ոստիկանական գազելով, ոտքերս ու ձեռքերս բռնելով տարել են անհայտ մի տեղ իջեցրել եւ այլն»:
Վարդգես Գասպարին վերջում հավելեց` «Ես նրանց կոնկրետ հարցեր եմ տվել եւ ոչ թե վերացական, փիլիսոփայական զեղումներ…»:
Եվա ՀԱԿՈԲՅԱՆ
