«Այդ հայտարարությունը տեղին չէ, այդ ճանապարհով պետք չէ գնալ»,-այսօր «Հայելի» մամուլի ակումբում պատասխանելով Aravot.am-ի հարցին՝ ինչպե՞ս է գնահատում ՀՀ ԱԳ փոխնախարար Շավարշ Քոչարյանի հայտարարությունը, թե «Դավութօղլուն սադրիչ հայտարարությունների փոխարեն թող այցելի Հայոց ցեղասպանության հուշահամալիր», այսպես պատասխանեց ՀՀՇ նախագահ Արարատ Զուրաբյանը:
Անդրադառնալով Դավութօղլուի՝ Հայաստան այցին, պարոն Զուրաբյանն ասաց. «Այցը որևէ կապ չունի Հայաստան-Թուրքիա հարաբերությունների հետ: Արտառոց որևէ բան չկա»:
Պարոն Զուրաբյանը հիշեցրեց, որ Թուրքիան ու Ադրբեջանը բարեկամական հարաբերություններ ունեն և հայ թուրքական հարաբերությունները նրանք մշտապես պայմանավորել են Հայաստան-Ադրբեջան կոնֆլիկտի լուծման ձևով, թուրքական սահմանի բացումն էլ շաղկապվեց դրա հետ ու դա տեղի չունեցավ:
Մեր պետական այրերի հետագա գործունեության մասին պարոն Զուրաբյանն այսպիսի կարծիք հայտնեց. «Մեր պետական այրերը համապատասխանաբար եռանախագահների առաջարկների վրա պիտի հիմնվեն ու շարունակեն իրենց կյանքն ու գործունեությունը:
Կարդացեք նաև
Մենք հինգերորդ «բ» և հինգերորդ «ա» դասարանները չենք, որ իրար հետ մշտապես խոսենք այդ լեզվով: Հայաստանը նույնպես պետք է ընթանա աշխարհի ընթացող ճանապարհով: Այսօր, վաղը, մյուս օրը ինչ-որ մի տեղ պիտի գանք նրան, որ մեր հարևանների հետ հաշտ ու համերաշխ ապրենք»: Պարոն Զուրաբյանը ողջունեց Նիկոլ Փաշինյանի նոր՝ «Քաղաքացիական պայմանագիր» նախաձեռնությունը և հնարավոր համարեց հետագա համագործակցությունը: ՀՀՇ-ի մասին պարոն Զուրաբյանն ասաց, որ տասնհինգ-քսան օր հետո արդեն կունենան գրանցված կուսակցության կարգավիճակ: Իսկ հետագա գործունեության մասին ասաց. «Չեմ գտնում, որ հենց հիմա դրոշը պիտի վերցնենեք ու նետվենք բարիկադներ: Ցավոք, Հայաստանում այսօր մայդան չկա»:
Տաթև ՀԱՐՈՒԹՅՈՒՆՅԱՆ
