Քանդակագործ Ֆերդինանտ Առաքելյանն այսօր «Հայելի» ակումբում խոսեց Նկարիչների Միության առաջիկա համագումարից և նախագահի ընտրությունից: Նա կարոտախտով հիշեց խորհրդային տարիները, երբ ոչ միայն ցուցահանդեսներ, այլեւ գնումներ էին կազմակերպվում:
Aravot.am-ը հետաքրքրվեց՝ ճարտարապետի կարծիքով նույնպիսի աժիոտաժ կլինի՞ իրենց համագումարին, ինչ պատահեց գրողների եւ կոմպոզիտորներ միությունների համագումարների ժամանակ:
«Դուք ուզում եք, որ այդպես լինի»,-ժպտաց արվեստագետը: Ապա հիշեց. «Արիկը Սաթյան, մի օր հեռուստաալիքներից մեկով ասաց, որ իրենք թույլ չենք տա, որ աղմուկ լինի իրենց համագումարին, ասաց՝ մեր կուլտուրան բարձր է՝ չի լինի: Զանգեցի, հումորով ասաց՝ հա իմ կուլտուրան քոնից բարձր է…Ամեն դեպքում, նկարիչների միության համագումարում կուլտուրան այնքան բարձր չի լինի, ինչպես ճարտարապետների մոտ»:
Ֆերդինանտ Առաքելյանը հավելեց, որ այս անգամ ուզում է մասնակցել նկարիչների միության համագումարին, նախորդ անգամ չի մասնակցել:
Ճարտարապետի համար միեւնույն է՝ ով կլինի նախագահ. «Կարեւոր չէ՝ տաղանդավոր է, թե՞ ոչ, կարեւորը լավ կազմակերպիչ լինի»:
Ճարտարապետը դեմ չէ Կարեն Աղամյանին, ասում է՝ լավ մարդ է, ուղղակի չի ուզում, որ 15 տարի պաշտոնավարի:
Նա դեմ է անսանձ դեմոկրատիային. « Հիշենք, թե ինչպես Պլատոնին հանեցին Աթենքից, եւ ո՞վ էր քվորում ապահովում՝ կոշկակարը, սոխ տնկողը…Դեմոկրատիան ախմախ բան է, քանդեց այս երկիրը, հետո էլ կքանդի Եվրոպան…Հիմա դառնանք Աղամյանին, չեմ ուզում, որ Աղամյանին մրոտելով ճանապարհեն, բայց դեմ եմ, որ տասնհինգ տարի նույն մարդը լինի նկարիչների միության նախագահ: Միջին սերնդի լավ տղաներ կան, որ կարող են նախագահ լինել: Մեր սերունդը պետք է հասկանա, որ արդեն մեզ է»:
Aravot.am-ը կարծիք հարցրեց նաեւ Լեւոն Թոքմաջյանի կերտած Ֆլորա Մարիտիրոսյանի քանդակի մասին: «Արվեստ է աբստրակտ, բայց պետք է հիշել , որ նրա երեխան ու հասարակությունը ուզում է հենց Ֆլորային տեսնել, դրա համար էլ վեճ է ծնվում: Տիպաժ չէ, բայց պիտի գոնե «Դլե յաման» երգողը երեւա»:
Գոհար ՀԱԿՈԲՅԱՆ
