Ներքաղաքային տրանսպորտի ուղեվարձի թանկացում պահանջող ուղեւորափոխադրողներն ավելի վաղ սպառնալու պես հայտարարել էին, որ ձյան առկայության պարագայում իրենք չեն կարող սպասարկել երթուղիները, քանի որ տրանսպորտային միջոցները ձմռանը նախապատրաստելու համար յուրաքանչյուրի համար անհրաժեշտ է 400– 580 հազար դրամ, ինչի հնարավորությունը վնասով աշխատող կազմակերպությունները չունեն։
Բայց ձյունը տեղաց, իսկ տրանսպորտը (իհարկե, հուրախություն Երեւանի բնակիչների), շարունակում է գործել։ Այսինքն՝ ստացվում է, որ ուղեւորափոխադրողները, որքան էլ փորձում էին տպավորություն ստեղծել, թե իրենց ֆինանսական դրությունը շատ ծանր է եւ ձմռանը չաշխատելու խիստ օբյեկտիվ պատճառներ ունեն, դա ընդամենը շանտաժի շարքից էր։
«Եթե մի 20 սմ ձյուն գա, կոմունալ ծառայությունները չկարողանան մաքրել, այդ ձյան վրա փոխադրումներ կատարելը հանցագործություն է հասկանո՞ւմ եք։ Իմ ասածը դա է եղել, որ եթե ձյունը գա ու ասֆալտը ծածկվի, կապրոնի անվադողերով փոխադրումներ կատարել չի կարելի, սահնակի պես մեր մեքենաները կսահեն, իսկ տեղանքը, դուք գիտեք, վերուվար է։ Այդ պայմաններում մեքենաները շահագործել կնշանակի վտանգի ենթարկել ազգաբնակչությանը։ Ես դա եմ ասել, եւ իմ ասածը կրկնում եմ ու պնդում եմ»,- երեկ ասաց Հայաստանի ուղեւորափոխադրողների միության նախագահ Հրանտ Եղիազարյանը:
Աննա ԶԱԽԱՐՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
