«Հայկական կինոյի զարգացման միջազգային միտումները» թեմայով քննարկման ժամանակ «Ոսկե ծիրան» կինոփառատոնի գեղարվեստական տնօրեն Սուսաննա Հարությունյանը Aravot.am-ի հետ զրույցում նշեց, որ իրենց «Ռեժիսորներ առանց սահմանների» համատեղ արտադրության ծրագիրը ծնվել է այն անհրաժեշտությունից, որ տարածաշրջանում հնարավոր չէ զարգացնել, կինո ստեղծել առանց համատեղ արտադրության՝ միջոցները շատ սուղ են:
Տիկին Հարությունյանը հավելեց, որ 2008-ին ԵԽ-ի հետ համատեղ կլոր սեղան են նախաձեռնել՝ տարածաշրջանի եւ իրենց «Ռեժիսորներ առանց սահմանների» ծրագրի շրջանում, Հայաստան հրավիրել Eurimage-ի այն ժամանակվա գլխավոր քարտուղարին, կազմակերպել նրա հանդիպումը մշակույթի նախարարի հետ:
«Ոսկե ծիրան» կինոփառատոնի գեղարվեստական տնօրենը համոզված է, որ Eurimage-ին Հայաստանի անդամակցելու շանսերը մեծ են, ուղղակի հարկ է, որ պետությունը արտգործնախարարության խողովակներով հայտ ներկայացնի եւ պարտավորվի տարեկան անդամավճար վճարել: Ըստ մեր զրուցակցի, մի քանի տարի առաջ խոսքը գնում էր 70-80 հազար եվրոյի մասին, եւ սա այն դեպքում, երբ Թուրքիան մի քանի անգամ շատ է վճարում, բայց 4 մլն-անոց ներդրում ստանում տարբեր նախագծերի միջոցով իր կինոարտադրությունում:
«Ես շատ ուրախ եմ, որ 2008-ի ճգնաժամից հետո, երբ բոլոր ծրագրերը սառեցված էին, Հայաստանի ազգային կինոկենտրոնը դարձավ միջնորդ եւ նորից նախարարության առաջ բարձրացրեց այդ հարցը: Ի դեպ, մենք պետք է նաեւ ունենանք ուժեղ նախագծեր եւ պրոդյուսերներ: Մեր նախագիծը այսքան տարիների ընթացքում փորձել է պրոդյուսերներ եւ ռեժիսորներ աճեցնել, որ եվրոպական ստանդարտներին համապատասխան նախագծեր կարողանան ներկայացնել»,- ասաց տիկին Հարությունյանը:
Կարդացեք նաև
Parallels Film Production անկախ կինոարտադրության հիմնադիր, կինոռեժիսոր Հովհաննես Գալստյանն էլ կլոր սեղանի ժամանակ ներկայացրեց համատեղ կինոարտադրության իրենց փորձը: Նա նշեց, որ իրենց համար սկզբունք է փնտրել ու գտնել այնպիսի ընկերություններ, որոնք առանձնապես հզոր չեն: Նաեւ հավելեց. «Մոնստրներին դժվար է հետաքրքրել»:
Կինոռեժիսորը փաստեց, որ փոքր ընկերությունները երբեմն ապահովագրված չեն կոնֆլիկտներից, ինչը իրենց հետ էլ է պատահել: Օրինակ՝ ֆրանսիական գործընկերոջ հետ խնդիրներ են ծագել, որովհետեւ Հովհաննես Գալստյանի ասելով, այն ցանկացել է բովանդակային եւ ստեղծագործական մասով ավելի մեծ մասնակցություն ունենալ նախագծում:
Parallels Film Production-ի հիմնադիրը նաեւ հավելեց. «Չնայած այդ ամենին, ֆրանսիացիների հետ համագործակցությունը միեւնույն ժամանակ էֆեկտ էր եւ տրամպլին՝ միջազգային ֆինանսավորում ստանալու համար»:
Մանրամասները՝ տեսանյութում:
Գոհար ՀԱԿՈԲՅԱՆ
