«Մարդկությունը պահպանում է միայն սերը, եւ սերն է այն բանաձեւը, որը լուծում է ե՛ւ կոնֆլիկտների խնդիրը, ե՛ւ բռնությունների խնդիրը, ե՛ւ ապահովում է երջանկությունը»,- դեկտեմբերի 7-ին «Ազգային արժեհամակարգ. Անցյալը, ներկան եւ ապագան» խորագիրը կրող համաժողովի ժամանակ հայտարարեց «Համահայկական ծնողական կոմիտեի» նախագահ Արման Բոշյանը:
Համաժողովի մասնակիցները պահանջում են ՀՀ Ազգային Ժողովի պատգամավորներից՝ չեղյալ հայտարարել ազգային արժեհամակարգի համար վտանգաբեր օրենքները ու զգոն լինել, որպեսզի հակազգային կեցվածք որդեգրած կառավարական որոշ մարմիններ չապահովեն նման օրենքների ընդունումը ԱԺ-ի կողմից, հանդես գալ սեռական այլասերվածությունների քարոզչությունը արգելող օրենսդրական նախաձեռնություններով:
Արման Բոշյանն իր խոսքում հիշեցրեց Ամերիկայի Միացյալ Նահանգների դեսպանատանը եւ միջազգային կազմակերպություններին, որ իրենք Հայաստանում ունեն ընդամենը հյուրի կարգավիճակ, եւ հետեւաբար՝ իրավունք չունեն խառնվել Հայաստանի ներքին գործերին: Նրա կանխատեսմամբ՝ սույն թվականի մայիսի 20-ին ընդունված «գենդերային օրենքից» հետո սպասվում է նույնասեռական ամուսնությունների մասին օրենքի ընդունումը, սկսվելու է արյունապղծության եւ մանկապղծության օրինականացման գործընթացը, հաստատվելու է յուվերալ արդարադատություն, կրթական համակարգում սեռական դաստիարակությունից հետո՝ այլասերման քարոզչությունը: Նա, ուսումնասիրելով «գենդերային օրենքը», եկել է այն եզրակացության, որ այն Ղրղըզստանում ընդունված «գենդերային օրենքից» տարբերվում է միայն 7.5 տոկոսով.
«Սոց նախարարությունը պնդում է, որ աշխատանքը տեւել է 3 տարի, եւ տարօրինակ ձեւով հայտնաբերեցինք, որ Ղրղըզստանում 2008 թվականին ընդունված եւ հաստատված «գենդերային օրենքը», մեղմ ասած, շատ նման է Հայաստանի օրենքին: Իսկ եթե ավելի հստակ ասենք, նախնական վերլուծությունը ցույց է տալիս, որ մեկը մյուսի թարգմանությունն է: Ես անձամբ թարգմանեցի Ղրղըզստանի օրենքը հայերեն, այդ քրտնաջան աշխատանքը ինձնից պահանջեց եւս 3, բայց ժամ: Տարեկան օրենքի տեքստի մշակման վրա հատկացվել է 3.5 միլիոն դրամ. Ինչպիսի՜ բարձր գներ են, ես, իսկապես, հուզված եմ»:
Կարդացեք նաև
Ամի Չիչակյան
