Հրաչյա Հարությունյանն իր գործի նախաքննության ավարտի հետ կապված ասել է, որ կուզեր դատական լսումները փակ ընթանային, որովհետև իր համար ծանր է տեսնել մահացածների հարազատների և մոտիկների ցավը: Փոխանցում է «Էն Տե Վե»-ն:
«Ես ինքս զգում եմ այդ ցավը, դրա համար նույնիսկ չուզեցի ծանոթանալ գործի նյութերին: Ուզում եմ, որ գործը շուտ տան դատարանին ու ընդունեն դատավճիռը: Պարզապես պետք է, որ ամեն ինչ մինչև վերջ պարզվի, որպեսզի ոչ ոք ղեկի վրա այլևս չկրկնի իմ սխալները: Դա միակ բանն է, որ ես կարող եմ անել», – ասել է Հարությունյանը, որի գործի նախաքննությունն ավարտվել է դեկտեմբերի 6-ին: Նա ընդունել է իր մեղքը և չի պատրաստվում գործը վերանայելու պահանջ ներկայացնել:
Հրաչյա Հարությունյանը այս տարվա հուլիսի 13-ին Մոսկվայի Պոդոլսկի մոտակայքում իր բեռնատարով ավտոբուսի էր բախվել, ինչի պատճառով 18 հոգի մահացել էր:
Պատրաստեց Հովհաննես ԻՇԽԱՆՅԱՆԸ
