Այսօր «Բլից ինֆո» ակումբում «Աղետների ռիսկի նվազեցման ազգային պլատֆորմ» հիմնադրամի տնօրեն Մովսես Պողոսյանը, խոսելով հնարավոր աղետների մասին, կարծիք հայտնեց, որ Երեւանում երկրաշարժ լինելու պարագայում շատ վատ հետեւանքներ կլինեն, այսինքն`ավելի վատ, քան եղավ Սպիտակում ու Գյումրիում։
Մովսես Պողոսյանի խոսքով`«Հայաստանի որդեգրած շինարարական չափանիշները լավն են, բայց գործնականում դրանք չեն պահպանվում, որովհետեւ ցանկացած ամուր կառուցապատում թանկ հաճույք է ու ավելի նախընտրելի է շենքն արագ, էժան կառուցել՝ չհիշելով հնարավոր երկրաշարժի մասին»:
Մովսես Պողոսյանը գտնում է, որ Երեւանի կենտրոնի խտակառուցված լինելը անթույլատրելի է ու վտանգավոր։
Կարդացեք նաև
Մովսես Պողոսյանը զգուշացնում եւ հորդորում է տանը ունենալ աղետի փաթեթ, որը միշտ դրված կլինի նույն տեղում ու տարին մեկ անգամ կթարմացվի: Իսկ փաթեթի մեջ, ըստ նրա, պետք է լինեն առաջին անհրաժեշտության առարկաներն ու սնունդը՝ բժշկական պարագաներ, փաստաթղթերի պատճեներ, ինչը կօգնի գոնե երեք օր դիմանալ՝ մինչ համապատասխան օգնության հասնելը:
Մովսես Պողոսյանը նկատեց, որ այսօր դպրոցներում եւ մանկապարտեզներում չորս անգամ բարձրացված է իրազեկվածությունը, ինչը հատկանշական է, եւ 25 տարի առաջվա համեմատ`արտակարգ իրավիճակների նախարարությունը եւ պլատֆորմը պատրաստ են կանխարգելել երկրաշարժի աղետալի հետեւանքները:
Եվա ՀԱԿՈԲՅԱՆ
