«Գեղամա երիտասարդական տարածքային ասոցիացիա» ՀԿ-ն նոյեմբերի 18-ից դեկտեմբերի 6-ը Գեղարքունիքի մարզի 50 դպրոցներում իրականացրեց «Ես ուզում եմ առողջ ապրել» հակածխախոտային ծրագիրը: Նպատակն էր դպրոցահասակների շրջանում բարձրացնել առողջության մասին գիտելիքների մակարդակը՝ ապահովելով առողջ ապրելակերպի մասին ճիշտ պատկերացում ծխախոտի օգտագործման առողջական հետևանքների և դրանցից առաջացած այլ հիվանդությունների զարգացման վերաբերյալ, ինչն իր հերթին կնպաստի ծխախոտի նկատմամբ դեռահասների բացասական վերաբերմունքին:
Ծրագրի շրջանակներում դպրոցներում 12 տարեկանից բարձր աշակերտների համար իրականացվել են սեմինար-քննարկումներ՝ ծխախոտի վտանգավոր ազդեցության վերաբերյալ, կազմակերպվել է հակածխախոտային պաստառներով ցուցահանդես, բաժանվել են ծխախոտի օգտագործման հակագովազդային պիտակներով կոնֆետներ և համապատասխան բուկլետներ: Իսկ ծրագրի ավարտին իրականացվեց ծխախոտի դատավարություն, և դատարանի վճռով այրվեցին ծխախոտն ու ծխախոտի տուփը:
Ծրագրի ղեկավար Վահան Դավթյանը նշում է, որ ծխախոտի դեմ տարվող պայքարը դեռևս չի համարվում բավարար, քանի որ բնակչության յուրաքանչյուր երեք քաղաքացուց մեկը համարվում է ծխող, և այդ վնասակար սովորությունը տարածվում է դպրոցահասակ տարիներից, ինչը բացասական ազդեցություն է ունենում ոչ միայն ուռուցքների առաջացման, այլև սիրտ-անոթային, նյարդային, մարսողական, շնչառական համակարգերի, միզասեռական օրգանների և զանազան ախտահարումների հարցում։
Կարդացեք նաև
Հաշվի առնելով նշված հանգամանքները՝ Վահան Դավթյանը շեշտեց, որ ծրագրի իրականացումը խիստ արդիական է, ուստի դեռահասների շրջանում հետաքրքիր, որակյալ և ամբողջական տեղեկատվությունը կխթանի, որպեսզի նրանց մոտ մարի ծխելու ցանկությունը, իսկ քաջածանոթ լինելով ծխախոտի վնասակար ազդեզությանը՝ կսկսեն միանալ ծխելու դեմ պայքարին:
Նշենք նաև, որ «Ես ուզում եմ առողջ ապրել» հակածխախոտային ծրագիրն անցկացվել է Հայաստանի երիտասարդական հիմնադրամի` որպես ՀՀ նախագահի կողմից ընտրված գործընկեր կազմակերպության կողմից հայտարարված դրամաշնորհային մրցույթի շրջանակներում։
Հայաստանի երիտասարդական հիմնադրամի
հասարակայնության հետ կապերի ծառայություն
