Այսօր «Peoplemeter» ակումբում «Ընդդեմ պարտադիր կուտակային կենսաթոշակային վճարների» քաղաքացիական նախաձեռնության անդամներ քաղաքագետ Դավիթ Մանուկյանը, ճարտարագետ Վահան Դուրինյանը եւ Լեւոն Հարությունյանը անդրադարձան նախաձեռնության գործունեությանը:
Վահան Դուրինյանի խոսքով` իրենք շատ լուրջ ու վճռական են տրամադրված`«Թող ոչ մեկը չկասկածի, մենք աշխատելու ենք, շարունակելու ենք այս շարժումը բոլոր հնարավոր միջոցներով»,- ասաց նա:
Դավիթ Մանուկյանի խոսքով էլ` դիմում են բոլոր քաղաքացիներին ովքեր մտահոգ են այս խնդրով, կոչ են անում միանալ իրենց: Նա հավելեց, որ պատրաստ են այս հարցով համագործակցել բոլորի հետ:
Լեւոն Հարությունյանն էլ հորդորեց տարածել, հասարակությանը տեղեկացնել, որ մարդիկ ճիշտ կողմնորոշեն, իմանան, որ ապօրինի ձեւով ստիպում են վճարել ու հայտնի չէ, թե այդ ֆոնդերն ինչքան կգոյատեւեն` «Այս քայլով խախտում են մարդկանց սահմանադրական իրավունքը»,- վստահեցրեց նա:
Կարդացեք նաև
Նախաձեռնության անդամները տեղեկացրեցին, որ ֆեյսբուքում նախաձեռնությանը արդեն միացել է 17 000 մարդ, բայց դա չի նշանակում, որ պարտադիր կուտակային կենսաթոշակներին դեմ են միայն այդքանը, ըստ երիտասարդների` նրանք իրականում ավելի շատ են:
Նախաձեռնության անդամները նաեւ հայտնեցին, որ չնայած օրենքը վիճարկվելու է ՀՀ Սահմանադրական դատարանում, այնուամենայնիվ, խնդրեցին, հորդորեցին եւ կոչ արեցին բոլոր մտահոգ քաղաքացիներին, քաղաքացիական բոլոր նախաձեռնություններին, հասարակական կազմակերպություններին, արհմիություններին, քաղաքական բոլոր ուժերին՝ անկախ կուսակցական պատկանելությունից, միավորվել եւ պայքարել բոլորի սոցիալական եւ սեփականության իրավունքների պաշտպանության համար, միասնաբար ու համատեղ ուժերով, կիրառելով օրենքով չարգելված բոլոր հնարավորությունները՝ արտահայտել անհամաձայնությունը հակասահմանադրական օրենքի վերաբերյալ:
Նախաձեռնության անդամները նաեւ հավելեցին, որ իրենք ոչ մի կուսակցության չեն պատկանում, բացի այդ, նշեցին, որ խոսակցություններն այն մասին, թե իրենք ֆինանսավորվում են ինչ-որ մարդկանց կողմից, չեն համապատասխանում իրականությանը:
Եվա ՀԱԿՈԲՅԱՆ
