Այսօր «Պոստ Սկրիպտում» մամուլի ակումբում հրավիրված մամուլի ասուլիսում Լոնդոնի օլիմպիական խաղերի բրոնզե մեդալակիր Հռիփսիմե Խուրշուդյանը հայտարարել է, որ խոստմանը համաձայն, վերադառնում է մեծ սպորտ եւ արդեն վերսկսել է մարզումները: Նրա խոսքերով, տեւական դադարից հետո դժվար էր ծանրաձողի հետ աշխատել: Բայց ամեն բան աստիճանաբար հունի մեջ է ընկնում:
Aravot.am-ի հետ առանձնազրույցում Հռիփսիմեն պատասխանեց մեր մի քանի հարցերին:
– Հիմա պոկում եւ հրում վարժություններում որքա՞ն ես բարձրացնում:
– Պոկումում` 80, հրումում` 100 կիլոգրամ:
Կարդացեք նաև
– Եկող տարվա ապրիլի սկզբներին Իսրայելում կայանալու է Եվրոպայի առաջնությունը, որին մասնակցելու ես: Հաղթելու համար որքա՞ն հարկավոր կլինի բարձրացնել:
– Մինչեւ ապրիլ ամիս պետք է հասցնեմ նորմալ մարզավիճակ ձեռք բերել: Բայց Եվրոպայի առաջնությունում անպայման չեմպիոնության կամ մրցանակակիր դառնալու համար չեմ պայքարելու: Մարզիչների հետ որոշել ենք, որ դա մեծ մրցահարթակ վերադառնալու փուլ է լինելու: Ավելի կարեւոր է աշնանը կայանալիք աշխարհի առաջնությունը, որտեղ մեդալներից զատ նաեւ օլիմպիական վարկանիշային միավորներ են խաղարկվելու: Ինչ վերաբերում է Եվրոպայի առաջնությանը, կարծում եմ, երրորդ տեղի համար անհրաժեշտ կլինի 115+140 կիլոգրամ: Համենայն դեպս, իմ իմանալով, նախորդում այդ արդյունքով են բրոնզե մեդալակիր դարձել: Կարծում եմ, կհասցնեմ ապրիլին մոտ լինել այդ ցուցանիշին:
– Որդիդ` Աշոտը, դեռ փոքր է: Հե՞տդ ես տանելու Եվրոպայի առաջնություն:
– Դժվար թե: Բայց եթե տեսնեմ, որ առանց ինձ չի մնա, կտանեմ:
– Չի՞ խանգարի:
– Չեմ կարծում: Ընդհակառակը, ավելի ուժ կտա:
– Հայաստանի հավաքականը առաջիկայում ուսումնամարզական հավաք է անցկացնելու Ծաղկաձորում կամ Աբովյանում: Մասնակցելո՞ւ ես:
– Ոչ: Մարզիչների հետ որոշել ենք, որ հիմա մարզվում եմ անհատական ծրագրով:
– Վերջնական նպատակդ:
– Ռիո դե Ժանեյրոյի օլիմպիական խաղեր:
Աշոտ ՀԱԿՈԲՅԱՆ
