Այսօր ՀՀԿ խմբակցության ղեկավար Գալուստ Սահակյանը խորհրդարանական վերջին ճեպազրույցների` իրեն հատկացված ժամանակի առյուծի բաժինը նվիրեց լրագրողներին:
Գալուստ Սահակյանը որոշեց լրագրողներին դասեր տալ այն մասին, թե ինչպե՞ս պետք է աշխատի լրագրողը: Անգամ «սպառնաց»`հավատարմագրերից զրկելու որոշումով եւ այլն:
Իր մենախոսությունից հետո պարոն Սահակյանը պատասխանեց նաեւ լրագրողների հարցերին: Մասնավորաբար, անդրադառնալով 2014 թվականի հունվարի 1-ից ուժի մեջ մտնող պարտադիր կուտակային կենսաթոշակային համակարգի ներդրմանն՝ ասաց. «Չեմ կարծում, որ պարտադիր բաղադրիչը մեկ տարի հետաձգելով, լռություն է տիրելու, հետո էլ ասելու են վեց ամսով հետաձգեք, մենք դա անողը չենք, դա բացառվում է, համակարգը գործարկվելու է հունվարի 1-ից»:
«Եթե ընդդիմության առաջարկն ընդունենք, ո՞վ է հետո դրա պատասխանը տալու, իսկ մենք կարող ենք պատասխան տալ մեր ընդունած օրենքի համար։ Եթե օրենքի կիրառման ընթացքում խնդիրներ լինեն, մենք հնարավոր է փոփոխություններ անենք: Մարդիկ գուցե հավատ չունեն ապագայի նկատմամբ, բայց յուրաքանչյուր հայ պետք է իր ներդրումն ունենա իր երկրի տնտեսության մեջ, և սա այդ դեպքն է»,- շարունակեց ՀՀԿ խմբակցության ղեկավարը։
Կարդացեք նաև
Լրագրողներից մեկի դիտարկմանը, որ խորհրդարանական ընդդիմությունը պատրաստվում է դիմել ՍԴ՝ կասեցնելու օրենքի կիրառումը և քննարկելու պարտադիր բաղադրիչը մեկ տարով հետաձգելու հարցը՝ բանախոսը հակադարձեց. «ՍԴ որոշումն, իհարկե, ընդունելի է ամեն պարագայում, բայց եթե այլ որոշում լինի, ապա այդ ժամանակ պատասխանատվությունը կմնա բողոքողների և ՍԴ-ի վրա»։
Ինչ վերաբերում է համապետական գործադուլին, որի մասին խոսել էր Զարուհի Փոստանջյանը, Գալուստ Սահակյանը երկար ժամանակ չէր կարողանում հասկանալ ի՞նչի մասին է խոսքը, ապա պատասխանեց. «Մի կողմից ասում են՝ աշխատատեղ չկա, մի կողմից՝ գործադուլ պիտի անեն, դա կարծես, երազախաբության պես մի բան է»։
Նելլի ԳՐԻԳՈՐՅԱՆ
