Ամփոփելով հինգերորդ գումարման նստաշրջանը «Ժառանգություն» խմբակցության ղեկավար Զարուհի Փոստանջյանն այսօր ասաց, որ կառավարությունը թափթփված եւ անշնորհք է, քանի որ չի կարողացել տեղավորվել իր ժամանակացույցում եւ գալիք շաբաթ նախատեսվում է արտահերթ նստաշրջան:
Թափթփվածությունն, ընդհանրապես, Զարուհի Փոստանջյանը համարում է ՀՀԿ-ի իշխանության գործելաոճը: Նա արձանագրեց, որ այս տարին ավարտում ենք հսկայական հարկային բեռով, որը գործելու է հունվարից, սպասվում է գնաճ. «Տվյալ պարագայում եւ ԱԺ-ի, եւ կառավարության աշխատանքն անբավարար եմ համարում»:
Ինչո՞ւ խորհրդարանական ընդդիմությունը անվստահություն չի հայտնում եւ չի լքում խորհրդարանի դահլիճը`հարցին, համաձայնեց, որ ընդդիմությունը պետք է դիմի արմատական միջոցների, բայց իր համոզմամբ, ընդդիմությունը դահլիճում է, թե`ոչ, իշխանությունը դրանից առանձնապես չի կաշկանդվում:
Զարուհի Փոստանջյանը գտնում է, որ ընդդիմադիրների համատեղ եւ արմատական, դրան զուգահեռ իրավական միջոցները կհանգեցնեն դրական արդյունքի:
Կարդացեք նաև
Լրագրողներից մեկը նկատեց, որ նախորդ անգամ, երբ տիկին Փոստանջյանն առաջարկում էր համազգային գործադուլ անել, «Ժառանգություն» խմբակցության քարտուղար Թեւան Պողոսյանն ասել էր, որ չի մասնակցելու դրան ու հետաքրքրվեց, եթե ներքին կոնսենսուս չկա, ինչպե՞ս են պատրաստվում համազգային կոնսենսուս գտնել: Զարուհի Փոստանջյանն ասաց, որ Թեւան Պողոսյանն անկուսակցական անձ է եւ ազատ է իր որոշումներում ու գործողություններում:
«Պարոն Պուտինը եկել էր գույքագրելու եւ հաշվառելու ՀՀ-ում իրեն պատկանող գույքը: Այդ տեսանկյունից, ՀՀԿ-ականների գնահատականը`պետական այց, այո, աննախադեպ էր, քանի որ նման պետական այց չի լինում»,- ՌԴ նախագահի այցի վերաբերյալ էլ ասաց բանախոսը:
Անդրադառնալով այդ օրը կազմակերպված ցույցերին էլ՝ ասաց, որ ոստիկանությունն իր ոճի մեջ էր եւ գործում էր այնպես, ինչպես միշտ ու կատարեցին իրենց հանձնարականը`թույլ չտալ ցուցարարներին տեղաշարժվել եւ իրենց բողոքի ձայնը լսելի դարձնել ռուս պաշտոնյաներին:
Նելլի ԳՐԻԳՈՐՅԱՆ
