«Ազատություն» ռադիոկայան. Ոչ միայն Ազգային ժողովի պատգամավորները, այլև անգամ կառավարության աշխատակազմի ղեկավարը տեղյակ չի եղել, որ Հայաստանը «Հայռուսգազարդին» պարտք է եղել ավելի քան 300 միլիոն դոլար:
Այսօր պատասխանելով «Ազատության» հարցերին՝ ՀՀ կառավարության աշխատակազմի ղեկավար-նախարար Վաչե Գաբրիելյանը, ով նախկինում երկար տարիներ զբաղեցրել է ֆինանսների նախարարի պաշտոնը, ասաց, թե «Հայռուսգազարդին» ունեցած պարտքի կուտակման մասին հարցերը պետք է տալ Էներգետիկայի նախարարին:
Գաբրիելյան․ – Վերջնական թվի վերաբերյալ տեղեկություն, բնականաբար, չունեի, քանի որ բանակցությունները ընթանում էին, և ինչ կլիներ հստակ այդ թիվը՝ պարզվեց բանակցությունների ընթացքում, ինչն էլ պարոն Մովսիսյանը հրապարակեց:
«Ազատություն»․ – Ինչո՞ւ էր գաղտնի պահվում այդ պարտքի մասին տեղեկությունը, ինչո՞ւ հանրությանը չէր տեղեկացվում, որ Հայաստանը իրականում նման հսկայական պարտքեր է կուտակում:
Գաբրիելյան․ – Ես չեմ կարող նման հարցի պատասխանել, քանի որ թիվը՝ պարտքը ինչքան էր, ինչքան չէր, որոշվում էր բանակցությունների ընթացքում:
Կարդացեք նաև
«Ազատություն»․ – Պարտքերը ֆիքսված չե՞ն լինում: 2011-ից ամեն ամիս մենք իքս գումար ենք պարտք կուտակել․․․
Գաբրիելյան․ – Ես ևս մեկ անգամ կրկնում եմ՝ դա բանակցվում էր: Հիմա թե ինչպե՞ս է բանակցվել և ներքին հաշվառում տարվել է, թե ոչ՝ չեմ կարող ասել: Բյուջետային մուտքերի և ելքերի տեսակետից նման պահանջ բյուջեի նկատմամբ չի եղել:
«Ազատություն»․ – 150-ը ռուսները որոշել են իրենք մարել: Ինչի՞ դիմաց:շ
Գաբրիելյան․ – Խնդրում եմ, որպես բանակցող կողմ՝ այդ բոլոր մանրամասները հարցնեք պարոն Մովսիսյանից:
«Ազատություն»․ – Կառավարությանը նա տեղյակ չի՞ պահում:
Գաբրիելյան․ – Կառավարությանը նա տեղյակ է պահում ընդհանուր գծերով: Ես բանակցությունների բոլոր դետալներին չեմ տիրապետում:
«Ազատություն»․ – Չէ՞ որ հսկայական գումարների մասին է խոսվում:
Գաբրիելյան․ – Ես շատ լավ հասկանում եմ: Կառավարության օրակարգով անցնում են բազմաթիվ հարցեր: Հիմա ես կոնկրետ այս հարցին չեմ տիրապետում:
«Ազատություն»․ – Իսկ գուցե ընտրությունների համար էր գաղտնի պահվում, որպեսզի բոլոր ընտրություններ ավարտվեին՝ խորհրդարանական, նախագահական, քաղաքապետի, որից հետո միայն ժողովրդին տեղյակ պահեին, որ գիտեք, սիրելի ժողովուրդ, 300 միլիոն դոլար դուք պարտք եք կուտակել:
Գաբրիելյան․ – Խիստ հետաքրքիր վարկած է, որը, կարծում եմ, դուք իրավունք ունեք քննարկելու: Ես անձամբ այդ վարկածին չեմ հիմա հավակնում հավատալ:
Ստացվում է, որ 2011 թվականից կուտակած այս պարտքի մասին տեղյակ է եղել միայն Էներգետիկայի նախարարը, ով էլ հանրապետությանը այդ մասին տեղյակ է պահել երեկ:
