Փաստաբան Ռուբեն Հակոբյանը հույս է հայտնում, որ ՀՀ գլխավոր դատախազը կաջակցի գործի արդարացի լուծմանը
ՀՀ փաստաբանների պալատի անդամ, փաստաբան Ռուբեն Հակոբյանը բողոք է ներկայացրել Լոռու մարզի դատախազ Գրիգոր Էլիզբարյանին` պահանջելով վերացնել ՀՀ ոստիկանության ՔԳՎ Լոռու մարզի քննչական բաժնի Տարոնի բաժանմունքի քննիչ Զորի Բաբայանի կայացրած որոշումը:
Համաձայն քննիչի որոշման` վանաձորցի Ռոբերտ Հովհաննիսյանի նկատմամբ քրեական գործ է հարուցվել ՀՀ քրօր-ի 112 հոդվածի առաջին մասի հատկանիշներով, այն է` դիտավորությամբ առողջությանը ծանր վնաս պատճառելը:
Փաստաբանը պահանջում է կարճել իր պաշտպանյալի նկատմամբ հարուցված քրեական գործով վարույթը:
Խնդրի մասին նա տեղյակ է պահել նաեւ ՀՀ գլխավոր դատախազին:
«2013 թվականի սեպտեմբերի 16-ին որովայնի շրջանում թափանցող մարմնական վնասվածքով Վանաձորի բժշկական կենտրոն է ընդունվում Կ. Ք-ն` հայտարարելով, որ վնասվածքը ստացել է վայր ընկնելու հետեւանքով: Դեպքից երկու ժամ անց պաշտպանյալս` Ռոբերտ Հովհաննիսյանը, մեղայականով ներկայանում է ոստիկանություն, եւ հայտնում է, որ տուժողի վնասն ինքն է պատճառել: Նա պատմել է, որ ծագած վեճի ժամանակ խլել է տուժողի ձեռքում առկա դանակն ու տուժողի դանակով հարվածել վերջինիս»,- «Առավոտի» հետ զրույցում ասում է փաստաբան Ռուբեն Հակոբյանը` նկատելով, որ մեղադրյալը գործել է անհրաժեշտ պաշտպանության վիճակում:
Նա տեղեկացնում է, որ թե տուժողը, թե մեղադրյալը երթուղայինի վարորդներ են:
Դեպքի օրը ոչ ճիշտ վազանց կատարելու հետեւանքով նրանց միջեւ միջադեպ է տեղի ունեցել: Տուժողը փորձել է դանակով հարվածել իր պաշտպանյալին, վերջինս էլ նրա ձեռքից խլել է դանակն ու այդ դանակով մեկ անգամ հարվածել տուժողին:
«Այստեղ չկա անհրաժեշտ պաշտպանության սահմանազանցում: Իմ պաշտպանյալի բոլոր գործողությունները ուղղված են եղել իրեն պաշտպանելու, եւ դա անհրաժեշտ պաշտպանության վիճակում գործելու օրինակ է»,- ասում է փաստաբանը:
Նա հավելում է, որ համաձայն դատաբժշկական փորձաքննության եզրակացության` մեղադրյալի մարմնի վրա առկա են եղել առողջությանը թեթեւ վնասի հատկանիշներ պարունակող թվով 12 վնասվածքներ, որոնցից ափի վնասվածքը, ըստ մեղադրյալի, առաջացել է տուժողից դանակը խլելու ժամանակ:
Իսկ համաձայն դատահետքաբանական փորձաքննության եզրակացության` մեղադրյալի հագուստների վրա կան բազմաթիվ վնասվածքներ, իսկ տուժողի մարմնի եւ հագուստի վրա առկա է ընդամենը մեկ մարմնական վնասվածք, մարմնի եւ հագուստի վնասվածքն իրենց տեղակայմամբ համընկնում են:
Փաստաբան Ռուբեն Հակոբյանը նկատում է, որ թեեւ այժմ էլ տուժողը որեւէ պահանջ չունի մեղադրյալից, այնուամենայնիվ, մի քանի ամիս տեւող նախաքննության ընթացքում բազմիցս փոխել է տված ցուցմունքները:
«Տուժողը սկզբում ասել էր, որ վնասվածքը ստացել է վայր ընկնելու հետեւանքով, հետո ցուցմունք է տվել այն մասին, որ իր ձեռքին դանակ չի եղել, մեղադրյալը եկել, դանակով իրեն խփել է: Մեղադրյալի հետ առերեսման ժամանակ տուժողը ընդունել է, որ դանակը իր ձեռքին է եղել, եւ մեղադրյալը իր ձեռքի դանակը խլել է եւ խփել է իրեն: Իհարկե, տուժողը պատճառաբանում է, որ ինքը դանակը պահել է, որպեսզի մեղադրյալը զգաստանա եւ իրեն վնաս չպատճառի, բայց ամեն դեպքում ընդունում է, որ դանակը եղել է իր ձեռքին: Դրանից հետո տուժողը ցուցմունքները մի քանի անգամ փոխել է»,- նկատում է նա:
Չնայած վերոնշյալ հանգամանքներին, ըստ փաստաբանի, առ այսօր քրեական հետապնդման մարմինը որեւէ գործողություն, որեւէ որոշում չի կայացնում, գործնական միջոցներ չի ձեռնարկում` անհրաժեշտ պաշտպանության վիճակում գործած անձին կալանքից ազատելու եւ նրա նկատմամբ քրեական գործով վարույթը կարճելու համար:
ԱՆՈՒՇ ԲՈՒԼՂԱԴԱՐՅԱՆ
«Առավոտ» օրաթերթ
