Հայաստանյան քաղաքական ուժերը ուշի ուշով հետեւում են Ուկրաինայում տեղի ունեցող իրադարձություններին: ԵՄ Ասոցացման պայմանագրի ստորագրումը հետաձգելու մասին իշխանությունների որոշման դեմ հանրության բողոքի ալիքը ընդլայնվում է։
«Ինքս հաջողություններ եմ մաղթում ուկրաինացի ժողովրդին` սեփական ազատության համար մղվող այս պայքարում: Եւ մաղթենք, որ բոլոր այդ պրոցեսները լինեն անարյուն»,- մեզ հետ զրույցում ասաց ՀԱԿ պատգամավոր Նիկոլ Փաշինյանը:
ԲՀԿ խմբակցության քարտուղար Նաիրա Զոհրաբյանի կարծիքով՝ այս խմորը շատ ջուր է տանելու:
Իսկ ՀՀԿ պատգամավոր Կարինե Աճեմյանի համար Ուկրաինայում անկանխատեսելի իրավիճակ է։
Ուկրաինայում ոստիկանության ուժերի եւ ցուցարարների միջեւ բախումների հետեւանքով վնասվածքներ է ստացել մոտ 200 մարդ: Ոստիկանությունը կիրառել է նաեւ արցունքաբեր գազ եւ լուսային նռնակներ: Ցուցարարների նկատմամբ կիրառված բիրտ ուժի համար Ուկրաինայի նախագահն իր ափսոսանքն է հայտնել եւ, ըստ էության, ներողություն խնդրել: Հայաստանում ընդդիմությունը չի հիշում դեպք, երբ իշխանությունը ներողություն խնդրած լիներ՝ բռնի ուժ կիրառելու համար, ինչպես օրինակ՝ մարտի 1-ի դեպքերից հետո, երբ զոհվեց 10 եւ վիրավորվեցին հարյուրից ավելի քաղաքացիներ։
Կարդացեք նաև
Մանրամասն՝ կարդացեք այստեղ
