Այսօր սոցիոլոգ, «Նոյ» ֆիրմայի նախագահ Գագիկ Սարգսյանը «Նոյյան տապան» -ի մամուլի սրահում խոսեց Հայաստանում անցկացված հասարակական կարծիքի հարցման մասին, որի նպատակն էր պարզել, թե ովքեր են Հայաստանի Հանրապետության ազդեցիկ մարդիկ:
Գագիկ Սարգսյանի ձեւակերպմամբ`նմանատիպ հարցում Հայաստանում անցկացվում է առաջին անգամ, քանի որ այն շատ բարդ է, եւ որի համար նախ պետք է ընտրել ճիշտ թիրախային խումբ, հակառակ դեպքում` շեղումներ կլինեն, ու հարցումը ճիշտ ցուցանիշ չի արձանագրի: Ամեն դեպքում, ըստ Գագիկ Սարգսյանի` գտնվեց ճիշտ թիրախային խումբը, հարցաթերթիկում նշվեց տասներկու ուղղորդված անուն եւ եւս տասներկուսը թույլատրվեց ավելացնել հարցվողին:
Հետազոտությունը տարվել է երկու ուղղությամբ` պարզելու նախ ՀՀ ազդեցիկ մարդկանց, եւ երկրորդը` այն մարդկանց, որոնք հասարակական կարծիք են ձեւավորում:
Գագիկ Սարգսյանի ներկայացմամբ` հարցումը կատարվել է բաժանվելով 1274 հարցաթերթիկ: Ազդեցիկ մարդկանց ցանկում, առաջին տեղը զբաղեցրել է ՀՀ նախագահ Սերժ Սարգսյանը, երկրորդ տեղում`ՀՀ առաջին նախագահ Լեւոն Տեր-Պետրոսյանն է եղել, երրորդ տեղում` «Բարգավաճ Հայաստան» կուսակցության առաջնորդ Գագիկ Ծառուկյանը, իսկ վարչապետը`վերջին 12-րդ տեղում է հայտնվել:
Կարդացեք նաև
Գագիկ Սարգսյանը ներկայացնելով նաեւ երկրորդ ցուցակը, նշեց, որ այս մեկում այն մարդիկ են, որոնք կարծիք են ձեւավորում հասարակության մեջ, այսինքն` ըստ նրա, արվեստագետներ, դերասաններ եւ այլք:
Այսպիսով` հասարակական կարծիք ձեւավորող ցուցակի առաջին տեղում, ըստ հարցման արդյունքների`կրկին հայտնվել է Սերժ Սարգսյանը, երկրորդ տեղում` «Առավոտ» օրաթերթի գլխավոր խմբագիր Արամ Աբրահամյանը, երրորդում` Գագիկ Ծառուկյանը, ապա Նիկոլ Փաշինյանը:
Ի դեպ, այս ցուցակում հայտնվել է նաեւ դերասան Վարդան Պետրոսյանը, քաղաքագետներ Ալեքսանդր Իսկանդարյանն ու Ստեփան Գրիգորյանը, նույնիսկ «Կյանքի խոսք» եկեղեցու հովիվ Արթուր Սիմոնյանը, լրագրողներ` Սաթիկ Սեյրանյանը, Պետրոս Ղազարյանը, Արմեն Դուլյանը, ապա Կոմիտաս Վարդապետը, կինոռեժիսոր, ազգագրագետ եւ այլք:
Գագիկ Սարգսյանին զարմացրել է, որ Արամ Աբրահամյանի ցուցանիշն այդքան բարձր է եղել: Այս փաստը միեւնույն ժամանակ ուրախացրել է սոցիոլոգին, նրա խոսքով`«Արամ Աբրահամյանի ցուցանիշը այլ երկրներում նախագահի թեկնածուի ցուցանիշ է, իր չափից շատ բարձր լինելով: Շատ լավ է, որ մարդիկ տալիս են այս անունները, ես լուրջ ոգեւորություն ապրեցի, որ այս ցուցակում հայտնվել են լրագրողներ, եւ նման գործունեություն ծավալող մարդիկ: Միշտ պետք է հետեւիցդ հետք թողնես…»,- ավելացրեց նա:
Գագիկ Սարգսյանը ավելացրեց, որ հարցումը նախաձեռնել է «Նոյ» ֆիրման, իսկ որոշակի շրջանակներ` Ռուսաստանից, հետաքրքրվել են Հայաստանի քաղաքական դաշտի ընկալումներով, հասարակության բարոյաքաղաքական վիճակով, սակայն ֆինանսավորում այնտեղից չի եղել:
Եվա ՀԱԿՈԲՅԱՆ
նման հարցումը առաջին չէ, քանի որ առաջինները կատարալ են մենք 1994-1998-ին, իսկ հետո, կար մի նախաձեռնություն, որը 4-5 տարի փորձագիտական ամենամսյա հարցումներ են ամում նույն թեմայով
Ադիբեկյան