Քիչ առաջ ավարտվեց պարտադիր կուտակային կենսաթոշակային համակարգից դժգոհ քաղաքացիների եւ Մարդու իրավունքների պաշտպանի խորհրդականի հետ հանդիպումը: Ակտիվիստները հրաժարվեցին վերեւ բարձրանալ եւ պահանջեցին պատասխանել՝ արդյոք Մարդու իրավունքների պաշտպանի գրասենյակը պատրաստվում է միանալ Սահմանադրական դատարանում օրենքի վիճարկմանը:
Ստանալով գրասենյակի դրական պատասխանը, ակտիվիստները ծափահարեցին եւ այս պահին շարժվում են դեպի կառավարության շենք:
Մարդու իրավունքների պաշտպանի գրասենյակի ներկայացուցիչ Արա Վարդեւանյանը ակտիվիստներին զգուշացրեց, որ պետք չէ շտապել Սահմանադրական դատարան դիմելու հարցում, որ կարողանան անթերի հայց ներկայացնել: Նա ասաց, որ Մարդու իրավունքների պաշտպանը ուսումնասիրություններ է կատարում օրենքի հետ կապված: Արա Վարդեւանյանը նաեւ ասաց, որ լուրջ խոչընդոտ կլինի օրենքի դեմ պայքարի հարցում, եթե իրենք թերի հայց ներկայացնեն: Նա միաժամանակ դժվարացավ ժամկետներ նշել, թե ինչ ժամանակում կհասցնեն ավարտին հասցնել իրենց աշխատանքները, թեեւ նշեց, որ դա ամիսներ չի տեւի:
Արփինե ՍԻՄՈՆՅԱՆ
