Ըստ «Դատալեքս» կայքի `Երեւան քաղաքի բնակիչ, 1951 թ. ծնված Հրանտ Օհանյանին մեղադրանք է առաջադրվել այն բանի համար, որ նա 2010թ. մարտի սկզբներին իր ծանոթ Սումբատ Տոնոյանից առաջարկ ստանալով Վրաստանում գերհարստացած ուրան տեսակի ռադիոակտիվ նյութ իրացնելու եւ այդ նպատակով ՀՀ քաղաքացի Գարիկ Դադամյանի միջոցով այն հայթայթելու ու Վրաստանի պատվիրատուներին մատակարարելու վերաբերյալ, ի կատարումն հանցավոր համաձայնության, հեռախոսազանգով կապվել եւ պայմանավորվածություն է ձեռք բերել այդ ժամանակ Մոսկվա քաղաքում գտնվող Գարիկ Դադամյանի հետ եւ վերջինիս պահանջով, Սումբատ Տոնոյանի անունից բանկային փոխանցումով Գարիկ Դադամյանին ուղարկել է 1000 ԱՄՆ դոլար գումար:
Հ. Օհանյանը 2010թ. մարտի 10-ին հանդիպելով նույն օրը Երեւան ժամանած Գարիկ Դադամյանին, նրանից ստացել է ապօրինի ձեռք բերված 17 գրամ քաշով գերհարստացած ուրան` ակնկալելով ապրանքի իրացումից հետո շահույթը բաշխել: Դրանից հետո Հրանտ Օհանյանը եւ Սումբատ Տոնոյանը 2010թ. մարտի 11-ին ռադիոակտիվ նյութը ՀՀ մաքսային սահմանով, մաքսանենգ ճանապարհով տեղափոխել են Թբիլիսի եւ նույն օրը փորձել իրացնել այն, սակայն բռնվել են Վրաստանի իրավապահների կողմից:
Հրանտ Օհանյանը կալանավորված է եւ գտնվում է արդարադատության նախարարության «Երեւան-կենտրոն» քրեակատարողական հիմնարկում: Հ. Օհանյանին մեղադրանք է առաջադրված ՀՀ քրեական օրենսգրքի 215 հոդվածի 2-րդ մասով («Թմրամիջոցներ, հոգեմետ, խիստ ներգործող, թունավոր, թունավորող, ռադիոակտիվ նյութերի, ռազմական նշանակության արտադրանքի, նման արտադրանք չհամարվող պայթուցիկ նյութերի եւ սարքերի, զենքի, բացի ողորկափող որսորդական հրազենից եւ դրա փամփուշտներից, միջուկային, քիմիական, կենսաբանական կամ զանգվածային ոչնչացման այլ տեսակի զենքի, երկակի նշանակության ապրանքների, ռազմավարական տեսակետից կարեւոր հումքային ապրանքների կամ մշակութային արժեքների, որոնց տեղափոխման համար սահմանված են հատուկ կանոններ, մաքսանենգությունը»): Սույն հոդվածը նախատեսում է 4-8 տարի ազատազրկում` գույքի բռնագրավմամբ:
Այս քրեական գործով դատավարության առաջին նիստը Տավուշի մարզի առաջին ատյանի դատարանում, Իջեւան քաղաքում նշանակված է այսօր` դեկտեմբերի 4-ին:
Կարդացեք նաև
Ոսկան ՍԱՐԳՍՅԱՆ
