Արջուտի դպրոցի տնօրենը մեղադրվում է դպրոցից գույք յուրացնելու մեջ
Լոռու մարզի առաջին ատյանի ընդհանուր իրավասության դատարանում, դատավոր Նարինե Հովակիմյանի նախագահությամբ, ընթանում է Արջուտ համայնքի միջնակարգ դպրոցի տնօրեն Անդրանիկ Սողոմոնյանի դատաքննությունը:
Անդրանիկ Սողոմոնյանին մեղադրանք է առաջադրվել այն բանի համար, որ նա, հանդիսանալով պաշտոնատար անձ, օգտագործելով իր պաշտոնեական դիրքը, 2012 թվականի սեպտեմբեր, նոյեմբեր ամիսների ընթացքում յուրացման եղանակով հափշտակել է ի պաշտոնե իրեն վստահված զգալի չափերով՝ 195.000 ՀՀ դրամ ընդհանուր արժողությամբ գույքը:
Նրա փաստաբան Ռուբեն Հակոբյանը, սակայն, անհիմն ու ապօրինի է որակում առաջադրված մեղադրանքը՝ այն համարելով իրավազուրկ ու անտրամաբանական:
«Բացարձակ անհիմն, ակնհայտ ապօրինի մեղադրանք է, եւ դատարանում ես ակնկալում եմ միմիայն արդարացման դատավճիռ»,- «Առավոտի» հետ զրույցում ասում է փաստաբանը՝ պատմելով դեպքի՝ դատաքննության ընթացքում պարզված հանգամանքները:
Նա ասում է, որ իր պաշտպանյալի նկատմամբ մեղադրանք է առաջադրվել դպրոցի սառնարանն ու տեսախցիկը յուրացնելու համար, այնինչ, վերջինս մտադրություն չի ունեցել յուրացնելու վերոնշյալ ապրանքատեսակները:
«Մինչ այս պահը պարզվել է, որ սառնարանը կայծակից վնասվել է, տնօրենը տեղափոխել է իր տուն, իր անձնական միջոցներով վերանորոգել է: Այդ ընթացքում դպրոցում պետական ծրագրով շինարարական աշխատանքներ են սկսվել, փոխվել են պատուհանները: Անդրանիկ Սողոմոնյանը սպասելիս է եղել շինարարության ավարտին, որպեսզի սառնարանը վերադարձնի դպրոց: Այդ ընթացքում, սակայն, սառնարանը հայտնաբերվել է եւ տարվել է դպրոց: Տեսախցիկն էլ խուզարկությունից երկու օր առաջ իմ պաշտպանյալը օգտագործել է կնոջ ծննդյան օրվա կապակցությամբ, ով նույնպես այդ դպրոցում մանկավարժ է աշխատում: Տեսախցիկը նորից դպրոց պիտի վերադարձվեր: Խուզարկության ժամանակ դա էլ է տանը եղել, համարել են, որ երկու իրը յուրացվել է»,- ասում է Ռուբեն Հակոբյանը՝ նկատելով, որ առաջադրված մեղադրանքը ոչ միայն իրավաբանության հետ առնչություն չունի, այլեւ առարկայազուրկ է, նման մեղադրանքներն էլ եզակի են լինում:
Անդրանիկ Սողոմոնյանն էլ մեզ հետ զրույցում զրպարտություն է որակում իրեն վերագրվող արարքը:
«Իմ տանը սառնարանը տեսել են հոսանքից անջատված, դռները բաց վիճակում, դիմացն էլ իմ սառնարանն էր՝ ուտելիքներով: Ինչ վերաբերում է տեսախցիկին, եթե ես մտածեի, որ կկասկածեն, շատ արագ կտանեի, տեղը կդնեի, բայց ես գիտեմ, որ ես հափշտակող չեմ: Ես ազատամարտիկ եմ, այդ դպրոցի հիմնադիր տնօրենն եմ, 25 տարի առաջ ես իմ ջանքերով հիմնեցի այդ դպրոցը, հիմա ինձ յուրացման մեջ են մեղադրում», – եզրափակում է Անդրանիկ Սողոմոնյանը՝ համոզմունք հայտնելով, որ դատարանը արդար վճիռ կկայացնի:
Անդրանիկ Սողոմոնյանի նկատմամբ որպես խափանման միջոց ընտրվել է չհեռանալու մասին ստորագրությունը: Նա ժամանակավորապես դադարեցրել է պաշտոնավարումը:
ԱՆՈՒՇ ԲՈՒԼՂԱԴԱՐՅԱՆ
Վանաձոր
«Առավոտ» օրաթերթ
