Այս պահին ակտիվիստները շարժվում են դեպի Մարդու իրավունքների պաշտպանի գրասենյակ՝ այնտեղից շարժվելու են կառավարության շենք: Ակտիվիստներին են միացել 4 խմբակցությունների պատգամավորներ, որոնք դատապարտում են ՀՀԿ-ի եւ ՕԵԿ-ի՝ այդ նախագծին կողմ քվեարկելը եւ ակտիվիստներին վստահեցնում են, որ սատարելու են նրանց ամեն մի ծրագիրը:
Պատգամավորները ակտիվիստներին ասացին, որ ստեղծվել է աշխատանքային խումբ 4 խմբակցություններից, որը քննարկելու է հետագա անելիքները. կլինե՞ն գործադուլներ, թե՞ հանրահավաքներ:
Ակտիվիստները, երբ իմացան, որ պարտադիր կուտակային կենսաթոշակային համակարգի ներդրման նախագիծը մեկ տարով հետաձգելուն կողմ էր քվեարկել 45 պատգամավոր, նրանք ծափահարեցին եւ շնորհակալություն հայտնեցին այդ պատգամավորներին:
Իսկ մյուս 54 պատգամավորներին, որոնք դեմ էին հետաձգմանը, ակտիվիստները սուլեցին եւ ամոթանք տվեցին: Ակտիվիստներին միացած պատգամավորների խումբը հայտնեց, որ առաջիկա օրերին դիմելու են Սահմանադրական դատարան՝ կուտակային կենսաթոշակային համակարգի օրենքի որոշ դրույթների սահմանադրական լինելը վիճարկելու համար:
Կարդացեք նաև
Այս պահին ակտիվիստները արդեն հասել են օպերայի շրջակայք եւ շարունակում են գոռալ՝ «Ամոթ» ու պահանջում՝ միացում: Նրանք նաեւ գոռում են՝ «Գործադուլ»:
Արփինե ՍԻՄՈՆՅԱՆ
