«Մենք հո իրենց վրա չե՞նք նեղանում, չե՞նք դատափետում, որ իրենք ինչո՞ւ են կողմ: Մենք ունենք մեր կարծիքը եւ պետք չի մեզ 37 թվականի օրենքներով քննադատել, որ եթե մենք իրենց նման չենք մտածում` ուրեմն վատն ենք»,- լրագրողների հետ ճեպազրույցում խորհրդարանում ասաց ՀՀ ԱԺ փոխնախագահ Էդուարդ Շարմազանովը`քսան րոպե ընդմիջման ժամանակ, որը վերցրեց ՀՅԴ խմբակցությունը`պարտադիր կուտակային կենսաթոշակային համակարգի ներդրման ԱԺ հայտարարության տեքստի քվեարկության ընթացքում:
Ի՞նչ կարող է քսան րոպեի ընթացքում փոխվել`լրագրողներից մեկի հարցին, Շարմազանովը պատասխանեց. «Միգուցե ՀՅԴ-ի մեջ փոխվի, մեր մոտ`չէ»:
Ապա պատգամավորներին հորդորեց. «Լինի ընդդիմադիր, այլընտրանքային, թե իշխանամետ, անկախ վաստակից`եւ պետության, եւ կուսակցության եւ հասարակության առջեւ ավելի կոռեկտ գտնվել: Բայց մենք ըմբռնումով ենք մոտենում: Կարծում եմ, կոռեկտությունը զարդարում է բոլորին: Ամեն քաղաքական ուժ ինքն է որոշում`ինչպես քվեարկել»:
Շարմազանովը նաեւ հիշեց նախագծի պատմությունը, որ 2010 թվականի դեկտեմբերի 22-ին այս դահլիճում քննարկվել է ՀՀ-ում կուտակային համակարգի ներդրման մասին նախագիծը, որին դեմ է քվեարկել միայն Վիկտոր Դալլաքյանը, ՀՅԴ-ն ու «Ժառանգությունը» չեն մասնակցել քվեարկությանը:
Կարդացեք նաև
Էդուարդ Շարմազանովը հիշեցրեց նաեւ, որ ԲՀԿ-ն էլ կողմ քվեարկել այդ նախագծին եւ հարցի հետ կապ ունեցող առանցքային նախարարությունները ղեկավարել են ԲՀԿ-ի նախարարները:
Անդրադառնալով լրագրողներից մեկի դիտարկմանը, որ ԱԺ դարպասների մոտ ցուցարարներ են հավաքված, Շարմազանովն ասաց, որ ՀՀԿ-ն հարգանքով է վերաբերվում ՀՀ յուրաքանչյուր քաղաքացու թե դժգոհություններին, թե քննադատություններին, թե պահանջներին. «Մենք ապրում ենք ժողովրդավարական երկրում, եւ շատ բնական է, որ այս կամ այն նախաձեռնության հետ կապված կլինեն քաղաքացիների խմբեր, ովքեր դեմ կամ կողմ կլինեն: Բայց մենք քվեարկում ենք մեր համոզմունքներին համապատասխան»:
ՀՅԴ խմբակցության քարտուղար Աղվան Վարդանյանն էլ լրագրողների հետ զրույցում ասաց, որ ընդդիմադիր խմբակցությունները կդիմեն ՍԴ: Նա վստահ է, որ ՀՀԿ-ում էլ կան պատգամավորներ, որոնք ևս համամիտ են իրենց հետ, սակայն, կա հրահանգ ու գործում են ըստ դրա:
Նելլի ԳՐԻԳՈՐՅԱՆ
