Երեկ ընդդեմ Մաքսային միության բողոքի երթի ժամանակ բերման ենթարկված ակտիվիստների մեծ մասը դատական ատյաններում վիճարկելու է իրենց նկատմամբ առաջադրված մեղադրանքները:
«Վիճարկելու ենք երեկվա իրենց հայտարարությունները, թե երթը անօրինական էր, շատերը վիճարկելու են բերման ենթարկելու ոստիկանների գործողությունները: Ինչ վերաբերում է Մաքսային միությանն անդամակցելու փաստաթղթերին ու գործընթացին, այդ բոլոր փաստաթղթերը, ներառյալ` Սերժ Սարգսյանի հայտարարությունը անօրինական ճանաչելու հայցադիմումով իրավապաշտպան Արթուր Սաքունցը դիմել է Վարչական դատարան»,- Aravot.am-ին ասաց «Արժանապատիվ Հայաստան» նախաձեռնության անդամ Հրայր Մանուկյանը:
Հիշեցնենք, որ ըստ Ոստիկանության տեղեկատվության, երեկ բերման ենթարկված 110 ակտիվիստից 109-ին պատիժ է սահմանվել: 43-ի նկատմամբ կազմվել է վարչական իրավախախտման արձանագրություն` վարչական իրավախախտումների վերաբերյալ օրենսգրքի 182-րդ հոդվածով նախատեսված զանցանք կատարելու համար, 62-ը վարչական պատասխանատվության են ենթարկվել 1801 հոդվածի 15-րդ կետով, 1-ը` 182-րդ հոդվածի և 1801 հոդվածի 11-րդ կետով և 3-ը` վարչական իրավախախտումների վերաբերյալ օրենսգրքի 1722 հոդվածով նախատեսված զանցանք կատարելու համար:
Արփինե ՍԻՄՈՆՅԱՆ
