Լոռու մարզի առաջին ատյանի դատարանում, դատավոր Նարինե Հովակիմյանի նախագահությամբ, շարունակվում է մեկ տարի առաջ «Մուշ» ռեստորանում փաստաբան Սամվել Շարբաթյանի սպանության մեջ մեղադրվող Սամվել Դիլոյանի, Արտակ եւ Արեն Վերանյանների դատաքննությունը:
Դատաքննությունն արդեն վկաների հարցաքննության փուլում է:
Այսօր հարցաքննվեցին փաստաբանի քրոջ դուստրը` Տաթեւիկ Ասլիկյանը, քույրը` Անժելա Ասլիկյանը եւ գործով անցնող վկաներից Գարեգին Ստեփանյանը:
Կարդացեք նաև
Անժելա Ասլիկյանը դատարանում հայտարարեց, որ նախաքննության ընթացքում իր տված ցուցմունքները սխալ են, դրանք տրվել են քննիչի ուղղորդման արդյունքում:
Նա դատարանում հայտարարեց, որ վկա Հայկ Ասլիկյանը իրեն մանրամասներ չի պատմել դեպքի վերաբերյալ:
«Հայկն ասաց, որ քեռուն սպանել են, ես իրեն ցավ չպատճառելու համար, հարցեր չեմ տվել, չեմ ցանկացել, որպեսզի նա վերապրի այդ պահերը»,-դատարանում ասաց Անժելա Ասլիկյանը:
Տաթեւիկ Ասլիկյանը եւս տվեց նույնաբովանդակ ցուցմունք` հրաժարվելով նախկինում տված իր ցուցմունքից:
Նա ասաց, որ Հայկ Ասլիկյանը վիճաբանության մասին մանրամասներ չի հայտնել իրեն` պնդելով, որ քննիչն է իրեն ուղղորդել:
Վկա Գարեգին Ստեփանյանն էլ նշեց, որ դեպքի օրը Սամվել Դիլոյանի կանչով մրգեր ու ծխախոտ է տարել ռեստորան, դեպքի մասին էլ տեղեկացել է լրատվամիջոցներից:
«Դեպքի օրը ժամը 7-8-ի սահմաններում Սամվել Դիլոյանի զանգով ես տարել եմ միրգ, ծխախոտ, ռեստորանի մուտքի մոտ տվել եմ իրեն ու հեռացել»,-ասաց Գարեգին Ստեփանյանը:
Անուշ ԲՈՒԼՂԱԴԱՐՅԱՆ
