Այսօր՝ դեկտեմբերի 3-ին ԵՄ կենտրոնում լրատվամիջոցների համար կազմակերպվող «Դեպի Վիլնյուս» խորագրող եզրափակիչ հանդիպմանը ԵՄ դեսպան Տրայան Հրիսթեան խոսեց նաեւ Ուկրաինայի Կիեւ մայրաքաղաքում տեղի ունեցող իրադարձությունների մասին: Նա նշեց, որ Եվրոմիության ղեկավար մարմիններն անհանգստացած են Ուկրաինայի իշխանությունների վարած քաղաքականությամբ եւ խորհուրդ են տալիս նրանց բանակցել երկրի բոլոր ուժերի հետ:
«Եվրոմիությունը հիասթափված է, որ Ուկրաինան որոշեց չստորագրել Ասոցացման պայմանագիրը, որն իր մեջ պարունակում է խորը եւ համապարփակ ազատ առեւտրի գոտու պայմանագիրը, բայց պետք է կրկնեմ Եվրոմիության դիրքորոշումը, որ ամենահավակնոտ պայմանագիրը, որ Եվրոմիությունը ստորագրում է ոչ եվրոպական որեւէ այլ երկրի հետ, բաց է եւ սեղանին է դրված»,- ասաց նա եւ ավելացրեց հնարավոր է Ուկրաինայի հետ վերսկսվեն բանակցությունները, որոնք կվերաբերեն պայմանագրի ժամկետների կիրառմանը եւ այլ հանգամանքներին: «Եվրոմիության փոխհարաբերությունները բոլոր անդամ-երկրների հետ ուղղորդվում են ոչ թե աշխարհաքաղաքական նկատառումներով, այլ արժեքային համակարգով, որը միավորում է բոլոր երկրներին»,- ասաց նա:
ԵՄ-Հայաստան հարաբերությունների մասին պարոն դեսպանը նշեց, որ գնահատում է՝ Հայաստանը ազատ կամաարտահայտման ձեւով պայմանագիր է ստորագրում իր գործընկերների հետ. «Եւ դա պետք է ոչ թե քննադատվի, այլ ընդհակառակը, գովեստի խոսքեր ասվի»,- ասաց նա:
Տրայան Հրիսթեան հիշատակեց, որ Վիլնյուսում նախեւառաջ գնահատական տրվեց նրան, թե ինչ է արվել Արեւելյան գործընկերության շրջանակներում չորս տարիների ընթացքում: Այժմ էլ ԵՄ շարունակելու է իր բարեփոխումների ծրագրերը իրականացնել Հայաստանում, դրանք կլինեն ծրագրեր, որոնք միտված կլինեն եվրոպական արժեքների ամրապնդմանը Հայաստանում: «Կարեւոր է, որ Վիլնյուսի գագաթաժողովում երկկողմանի ձեւով նշվեց, որ հիմքը արժեքներն են, որոնց կոնկրետ ճյուղեր մատնանշվեցին ապագա համագործակցության համար: Դրանք վերաբերում են արդարադատության համակարգի բարեփոխումներին, որոնք պետք է հիմնվեն եվրոպական արժեհամակարգի վրա, լավ կառավարմանը, կոռուպցիայի դեմ պայքարին, ժողովրդավարության առաջմղմանը: Բայց նաեւ արտահայտվեց ցանկություն խորացնել ճյուղային համագործակցությունը եւ շարժունակությունը: Նույնպես նշվեց, որ Ասոցացման պայմանագրի բոլոր կետերն իրականացված են, որը վերաբերում է նաեւ խորը համապարփակ առեւտրին:
Կարդացեք նաև
Եվրամիությունը շարունակում է ունենալ իր պարտավորվածությունը՝ ներգրավված լինել Հայաստանի բարեփոխումներում: Եվ մենք սպասում ենք մեր հայ գործընկերների առաջարկներին, թե կոնկրետ ինչեր կարելի է անել եւ որ ճյուղերում, այն առումով, որ այն համատեղելի լինի Հայաստանի նոր պարտավորվածությունների հետ: Այդ կոնկրետ բարեփոխումների մասին արդեն կխոսվի Վիլնյուսի գագաթաժողովից հետո: Ես չեմ ուզում ասել, որ այս համագործակցությունը կլինի համեմատելի Եվրամիության այլ գործընկերների հետ համագործակցության հետ, բայց մենք այս փոխհարաբերությունը դիտարկում ենք այն նորմերի, արժեքների համակարգում, որոնք հիմքն են կազմում Արեւելյան գործընկերությանը:
Ինչպես արդեն ասել եմ՝ Վիլնյուսի համաժողովից հետո կյանքը չի կանգնում եւ Հայաստանը մնում է կարեւոր գործընկեր Արեւելյան գործընկերության շրջանակներում»,- ասաց ԵՄ դեսպան Տրայան Հրիսթեան:
Հռիփսիմե ՀՈՎՀԱՆՆԻՍՅԱՆ
