Երեկ ՀՀ և ՌԴ կառավարությունների միջև ստորագրվեց «ՀայՌուսգազարդ» փակ բաժնետիրական ընկերության բաժնետոմսերի առքուվաճառքի և հետագա գործունեության պայմանների մասին համաձայնագիրը: Համաձայն դրա` «ՀայՌուսգազարդի» բաժնետոմսերի՝ ՀՀ-ին պատկանող 20 տոկոս մասնաբաժինը փոխանցվեց ռուսական «Գազպրոմին», և ռուսական ընկերությունը, փաստորեն, դարձավ «ՀայՌուսգազարդի» 100 տոկոս սեփականատերը:
Aravot.am-ը «Թրանսփարենսի ինթերնեյշնլ» հակակոռուպցիոն կազմակերպության տնօրեն Վարուժան Հոկտանյանից հետաքրքրվեց` արդյոք համարժե՞ք էր այն գինը, որ ՀՀ-ն վճարեց Ռուսաստանին, նրան, թե ինչ ենք ստանալու: Հարցին պարոն Հոկտանյանը պատասխանեց այն տեսանկյունից, թե Հայաստանն արդյոք ունե՞ր որոշում կայացնելու իրավունք, թե՞ ոչ: Նա մասնավորապես ասաց. «Իրավիճակային այսպիսի որոշումները գալիս են նրանից, որ մենք չունենք ներքին ուժ: Չգիտեմ Ասոցացման համաձայնագի՞րը, թե՞ Մաքսային միությունն էր բխում երկրի շահերից, բայց հարցն այն է, իսկ մենք կարո՞ղ էինք որոշել»:
Վարուժան Հոկտանյանը բերեց Ավստրիայի օրինակը, որը ևս կախված է «Գազպրոմից», բայց նրան չէին կարող ստիպել, քանի որ ուժեղ պետություն է: Իսկ թե ինչու են մեզ կարողանում ճնշել, այս մասին պարոն Հոկտանյանը հետևյալ կարծիքը հայտնեց. «Դա կախված է լեգիտիմության, տնտեսական մոդելի ընտրության հարցի, սոցիալական անհավասարության խնդիրներից: Այդ բոլոր գործոններն այնպիսին են, որ բավականին հեշտացնում են մեզ ճնշելը»:
Համեմատության համար պարոն Հոկտանյանը նշեց, թե Ավստրիան ու Շվեյցարիան ոչ Մաքսային միության ոչ էլ ԵՄ անդամ չեն, չնայած, օրինակ` Շվեյցարիան, ինչպես Հայաստանը, չունի ելք դեպի ծով:
Կարդացեք նաև
Տաթև ՀԱՐՈՒԹՅՈՒՆՅԱՆ
Աւստրիան ԵՄ-ի անդամ չէ՞