«Մեր նպատակն է պարզել, թե Հայաստանում ինչ սկզբունքներով են գործում փորձագիտական բազաները, ինտեգրվել միջազգային բազաներին և աշխատել տեղեկատվության արդյունավետ փոխանակման ուղղությամբ: Միջազգային փորձը ցույց է տալիս, որ այդ բազաների սպառողներն են իրավական ոլորտի աշխատողները, օպերատիվ, քննչական ծառայությունները, փորձագիտական-քրեագիտական աշխատանքներ իրականացնող կառույցները, մյուս կողմից ` գիտական հաստատությունները: Մենք ուզում ենք, որ մեզ մոտ էլ նման սկզբունքով բազաները կազմավորվեն և զարգանան»,- ասաց Հայաստանի Հանրապետության գիտությունների ազգային ակադեմիայի «Փորձաքննությունների ազգային բյուրո » ՊՈԱԿ-ի տնօրեն Արտաշես Ջավադյանը:
Այսօր ՀՀ Գիտությունների ազգային ակադեմիայում տեղի ունեցավ «Փորձաքննությունների ազգային բյուրոյում կազմավորված փորձագիտական տվյալների բազաների կազմակերպչական և գիտագործնական փորձի ուսումնասիրությունը, դրանց համադրումը հանրապետությունում առկա դատափորձագիտական բազաների հետ, դրանց ` եվրոպական դատափորձագիտական տվյալների բազաներում ինտեգրման նախադրյալները» թեմայով երիտասարդական գիտաժողովի բացումը:
Իր հանդիսավոր խոսքում Արտաշես Ջավադյանը նշեց, որ ողջունելի փաստ է, որ գիտաժողովին մասնակցություն ունեն երիտասարդ գիտնականները, որոնցից երկուսն իրենց զեկույցները կներկայացնեն միջոցառման բացման ժամանակ, մյուսները` արդեն ՀՀ ԳԱԱ Աղվերանի գիտաժողովների տանը, որտեղ էլ տեղի է ունենալու բուն գիտաժողովը:
ՀՀ ԳԱԱ -ի «Փորձաքննությունների ազգային բյուրո» ՊՈԱԿ -ի փորձագետ Նելլի Հովհաննիսյանի զեկույցը նվիրված էր տվյալ կազմակերպության ֆիզիկատեխնիկական հետազոտությունների և քիմիական փորձաքննությունների բաժնում կատարված աշխատանքներին: Մասնավորապես ներկայացրեց թմրանյութերի և հոգեմետ նյութերի հետազոտություններին նվիրված տեղեկատվական բազաների աշխատանքը` կարևորելով հատկապես գունային թեստերի դերը. «Օրեցօր աճում են թմրանյութերի քանակներն ու տեսակները, այդ պատճառով մենք անցկացնում են գունային թեստեր, համեմատում դրանց հիման վրա ստեղծված բազաների հետ և որոշում թմրանյութի և հոգեմետ նյութի տեսակները», -ասաց նա:
Կարդացեք նաև
Ըստ Նելլի Հովհաննիսյանի ` որպես հետազոտվող նյութեր կարող են հանդես գալ ինչպես բուսական, այնպես էլ սինթետիկ ծագման թմրանյութերը. «Օրինակ, եթե մենք ունենք անհայտ նմուշ և այն տեղադրել ենք կերամիկական ակոսում, վրան ավելացրել որևէ քիմիական նյութ, որից հետո այն ստացել է նարնջագույն տեսք, կարող ենք ենթադրել, որ անհայտ նմուշն իրենից ներկայացնում է մետամֆետամին »,-հավելեց նա:
Զեկույց ներկայացրեց նաև ՀՀ ոստիկանության փորձաքրեագիտական վարչության փորձագետ Արսեն Գեղամյանը , ով կարևորեց մատնադրոշմային և գնդակապարկուճային հաշվառումների դերը Հայաստանում` ասելով, որ դրա միջոցով բացահայտվում են մի շարք հանցագործություններ, իսկ շատերն էլ կանխվում են . «Միայն այն փաստը, որ յուրաքանչյուր ոք հաշվի կառնի այն հանգամանքը, որ իր անունը հաշվառված է և ենթակա է ստուգման, կխուսափի հանցագործություն կատարելուց»,-ասաց նա:
Արսեն Գեղամյանի զեկույցից հետո հանդիպման մասնակիցները շտապեցին ՀՀ ԳԱԱ Աղվերանի տուն` անցկացնելու գիտաժողովը: Այնտեղ զեկույցներ են ներկայացնելու հայաստանյան 7 ազգային գիտական կենտրոնների, գիտահետազոտական ինստիտուտների ներկայացուցիչները: Նշենք, որ գիտաժողովը նվիրված է ՀՀ Գիտությունների ազգային ակադեմիայի հիմնադրման 70-ամյակին: Անցկացվում է Հայաստանի երիտասարդական հիմնադրամի և ՀՀ ԳԱԱ Երիտասարդական խորհրդի աջակցությամբ:
Նազենի ԲԱՂԴԱՍԱՐՅԱՆ
