Ինչո՞ւ «ՀայՌուսգազարդի» 20 տոկոս բաժնեմասը վաճառելու որոշումը չի քննարկվել հասարակության հետ: Այսօր խորհրդարանում այս հարցը լրագրողներն ուղղեցին քաղաքական մեծամասնության ղեկավար Գալուստ Սահակյանին: Վերջինս ասաց. «Շատ է շահարկվում հանրության հետ քննարկումը, հանրությունը ստեղծում է քաղաքական թիմ, որն իր պատասխանատվության և լիազորությունների շրջանակներում պիտի կարողանա գործողություններ կատարել։ Այնպես չի, որ ամեն ինչը պիտի գանք Ազատության հրապարակում հարցնենք ու գնանք։ Հանրություն ասածը մեծ հասկացություն է, և եթե որևէ խնդրի լուծման ժամանակ բողոքներ չլինեն, դա վարկաբեկիչ կլինի մեր ազգի համար։ Այնպես չի, որ մեր ընտանիքներում մեծով փոքրով պիտի համաձայն լինենք»։
Լրագրողները հետաքրքրվեցին նաեւ, թե ինչպե՞ս է Գալուստ Սահակյանը վերաբերվում ՀԱԿ խմբակցության քարտուղար Արամ Մանուկյանի՝ այս հարցի շուրջ երեկ խորհրդարանի ամբիոնից արած այն դիտարկմանը, որ «Հայաստանի իշխանությունը նման է գեշ հարսի, ով ավելացնելու փոխարեն, տնից դուրս է հանում ամեն ինչ»։ «Ես կարծում եմ, որ նրանց հարսնության ժամանակ այնպիսի բաներ են տեղի ունեցել, որ հարսի մաշկն էլ չի մնացել, այնպես որ թող հանգիստ մնա»,- ասաց ՀՀԿ խմբակցության ղեկավարը։
Նելլի ԳՐԻԳՈՐՅԱՆ
