Քայքայիչ աղանդներից տուժածների օգնության եւ վերականգնողական կենտրոնի տնօրեն Ալեքսանդր Ամարյանն այսօր «Հայելի» ակումբում սենսացիոն հայտարարություն արեց, ասաց, որ ունի լուսանկարներ, որտեղ բանակի հայաստանցի գեներալն այլ պաշտոնյաների հետ մասնակից է աղանդավորական միջոցառմանը, անգամ ողջագուրվելու ֆոտոփաստեր կան:
Նաեւ հավելեց, թե բազմիցս լինելով բանակում, ուսումնասիրելով ինքնասպանություն կատարածների պատմությունները, պարզել է, որ նման զինծառայողների գրպաններից հաճախ հայտնաբերվել են զանազան կրոնական կառույցների սիմվոլներ: Դրանք Ամարյանին տրամադրել են բանակի սպաներն ու ղեկավարությունը: Քայքայիչ աղանդներից տուժածների օգնության եւ վերականգնողական կենտրոնի տնօրենը հայտնեց, որ դրանք եղել են հիմնականում սատանայապաշտական եւ խարիզմատիկ կառույցներին բնորոշ սիմվոլներ: Ամարյանի համոզմամբ, կրոնական կառույցներում օրենքով նախատեսված չէ վերահսկողություն, դրա համար էլ, ունենք այն, ինչ ունենք:
Նա պնդում է, որ կրոնական կառույցները համագործակցում են եւ բանակի ներկայացուցիչների, եւ իշխանավորների հետ: Նույնիսկ խոստացավ լուսանկարներ տրամադրել:
Aravot.am-ի պնդմանը, որ անուններ հնչեցնի, Ալեքսանդր Ամարյանը պատասխանեց, թե անուններ չի տա, քանի որ չի ուզում, որ վհուկների որս սկսվի այդ մարդկանց ընտանիքների անդամների դեմ:
Կարդացեք նաև
«Ի դեպ, երեկ էլ Մաշտոցի վրա Եհովայի վկաները հանգիստ գրքեր էին բաժանում, Ռուսաստանում դրանք համարվում են էքստրեմիստական գրականություն»,- ասաց նա՝ նշելով օրենսդրական դաշտի ու փորձագետների բացակայությունը:
Գոհար ՀԱԿՈԲՅԱՆ
