Խորհրդարանում այսօր շարունակվում են պարտադիր կուտակային կենսաթոշակային համակարգի կիրառումը մեկ տարով հետաձգելու եւ փոխզիջում գտնելու պարտադիր բաղադրիչը հանելու շուրջ քննարկումները:
Հիշեցնենք, որ ընդդիմադիր խմբակցությունների նախաձեռնությամբ ԱԺ հայտարարության նախագիծը երեկ արտահերթ կարգով մտավ քառօրյա նիստերի օրակարգ:
Խորհրդարանական քննարկումներին զուգահեռ՝ ԱԺ դարպասների մոտ այսօր դարձյալ շարունակվում են այդ համակարգին դեմ քաղաքացիների ակցիաները: «Ոչ, ոչ» վանկարկումներով եւ տարատեսակ պաստառներով նրանք կկանգնեն խորհրդարանի դարպասների մոտ`մինչեւ հարցի քվեարկությունը:
Կարդացեք նաև
Այսօր, ծրագրավորողներին միացել են նաեւ ՀԱԷԿ-ի աշխատակիցները: Ակցիայի մասնակիցները ևս կողմ են օրենքը մեկ տարով հետաձգելուն: «Մարդիկ ոչ թե օրենքին են դեմ, այլ մեղմ ասած, անվստահություն ունեն կառավարության նկատմամբ»,- Aravot.am-ի հետ զրույցում ասաց մասնագիտությամբ ծրագրավորող Հարություն Մարտիրոսյանը:
Մանրամասները`տեսանյութում
Իսկ «Սինոփսիս» ընկերությունում աշխատող Հայկ Աբրահամյանը մեզ հետ զրույցում ասաց, որ հետագա անելիքները կախված կլինեն հարցի քվեարկության արդյունքներից:
Aravot.am-ի հետ զրույցում քաղաքական մեծամասնությունը ներկայացնող Գալուստ Սահակյանն ասել էր, որ հարցի հերթական քննարկման արդյունքում իրենց տեսակետը չի փոխվելու: Այդ հիշեցմանը մեր զրուցակիցը հակադարձեց. «Գալուստ Սահակյանին մեկնաբանել չարժե: Անընդհատ ինքն իրեն հակասում է. ժամը մեկ ինքն իրեն հակասող հայտարարություններ է անում: Բայց, որ իրենք այդպես են տրամադրված, դա չի նշանակում, որ մենք պետք է սուս ու փուս համակերպվենք: Մենք պետք է պայքարենք մեր իրավունքների համար»:
Մեր զրուցակիցն ասաց նաեւ, որ քվեարկության բացասական արդյունքի դեպքում թերեւս դիմեն ՍԴ`հուսով, որ ՍԴ-ն այս անգամ իր լիազորություններից չի շեղվի, քանի որ հարցը վերաբերվում է ՀՀ քաղաքացիների շահերին, ոչ թե որոշ անձանց գրպանի շահերին:
Նելլի ԳՐԻԳՈՐՅԱՆ
