«Հայկական բժշկական ասոցիացիա» հասարակական կազմակերպությունն իրականացնում է «Ծխախոտի վնասակար ազդեցության մասին տեղեկատվության մատուցում և իրազեկվածության մակարդակի բարձրացում Լոռու, Տավուշի և Գեղարքունիքի մարզերում» ծրագիրը։
Հայկական բժշկական ասոցիացիայի ներկայացուցիչ Հարություն Հարությունյանը նշեց, որ կազմակերպությունն արդեն իսկ եղել է 10 դպրոցում։ Սեմինարների միջոցով դեռահասներին հնարավորինս պարզ, ինտերակտիվ մեթոդներով ներկայացվում է ծխախոտամոլության վնասների մասին։ Աշակերտներին ներկայացվող նյութը պարունակում է նաև տեղեկատվություն, թե ինչպես թողնել ծխելը, ինչը կարող է օգտակար լինել թե′ դեռահասների, թե′ նրանց շրջապատող մեծահասակների համար։ Հարություն Հարությունյանը նշում է, որ կան շատ աշակերտներ, որ տեղյակ չեն անգամ, որ հասարակական տրանսպորտում կամ հասարակական վայրերում ծխել չի կարելի, դրա համար տուգանք է հասնում։
Դիլիջանի ավագ դպրոցի տնօրեն Արա Արամյանը նշում է, որ դպրոցում կան ծխող երեխաներ, թեև նրանց թիվը շատ քիչ է։ Ըստ տնօրենի` ծխելու խնդիրը հենված է երեք կարևոր կետերի վրա՝ ընտանիք, դպրոց, հասարակություն. «Դպրոցն իր աշխատանքն անում է։ Ցավոք, երբեմն ըտանիքն ու հասարակությունը շատ համբերատար են վերաբերվում, անտարբեր են երեխաների ծխելու հանգամանքին։ Եվ ստացվում է՝ որքան էլ դպրոցն իր աշխատանքն անի, մնում է պարտվածի կարգավիճակում»։ Տնօրենը նշում է, որ ինքը չի ծխում ո′չ իր աշխատասենյակում, ո′չ ուսուցիչների, ո′չ էլ առավել ևս աշակերտների մոտ։ Նա նկատում է նաև, որ ցանկացած նման դասընթաց երեխաների մոտ կարող է դրական ազդեցություն ունենալ, բայց իրական նպատակին հասնելու համար անհրաժեշտ են սկզբունքային, հետևողական քայլեր։
Նշենք, որ «Ծխախոտի վնասակար ազդեցության մասին տեղեկատվության մատուցում և իրազեկվածության մակարդակի բարձրացում Լոռու, Տավուշի և Գեղարքունիքի մարզերում» ծրագիրն անցկացվում է Հայաստանի երիտասարդական հիմնադրամի` որպես ՀՀ նախագահի կողմից ընտրված գործընկեր կազմակերպության կողմից հայտարարված դրամաշնորհային մրցույթի շրջանակներում։
Հայաստանի երիտասարդական հիմնադրամի
հասարակայնության հետ կապերի ծառայություն
