Կենտրոն եւ Նորք-Մարաշ վարչական շրջանների ընդհանուր իրավասության դատարան չէր ներկայացել Հայաստանի քաղաքագետների միության նախագահ Հմայակ Հովհաննիսյանը:
Նա գրավոր դիմել էր դատավոր Գագիկ Պողոսյանին, հայտնել, որ մասնակցում է միջազգային ֆորումի, որը նվիրված է մաքսային միությանն ու հայ-ռուս հարաբերություններին, անգամ դատարան էր ուղարկել ռուսերեն հրավիրատոմսը, որտեղ նաեւ նշված էր, որ ժ.10-ին նշանակված է իր ելույթը:
Դատարանին անհայտ պատճառներով չէր ներկայացել նաեւ Հմայակ Հովհաննիսյանի պաշտպանը՝ Գեորգի Գուլքանյանը:
Հմայակ Հովհաննիսյանը մեղադրվում է «Հայհիդրոէներգոնախագիծ» ընկերության նախագահ Սենիկ Ջուլհակյանին մարմնական վնասվածք հասցնելու համար: Դեպքը տեղի էր ունեցել անցյալ տարվա ապրիլի 21-ին, նշյալ ինստիտուտի շենքի դիմաց:
Կարդացեք նաև
Սենիկ Ջուլհակյանի վնասվածքը դատաբժիշկները գնահատել են միջին ծանրության վնաս ձախ սրունքի շրջանների արյունազեղման, ձախ ձեռքի 3-րդ եւ 5-րդ հիմային ֆալանգների չտեղաշարժված կոտրվածքների ձեւով:
Տուժող Սենիկ Ջուլհակյանի կարծիքով, չնայած ամբաստանյալը բացակայում է անհարգելի, սակայն նա միացավ դատախազին, հետաձգելու նիստը:
Դատավոր Գագիկ Պողոսյանը չէր մոռացել, որ անցյալ նիստին էլ տուժողն էր բացակայել, եւ դա որակեց «ազատ դիտորդի» կարգավիճակով դատարան ներկայանալու, սակայն նույնպես հետաձգեց դատական նիստը, միեւնույն ժամանակ նկատելով, որ ամբաստանյալը ֆորումի մասնակցելու համար չէ, այլ դատարան գալու համար:
Դատական հաջորդ նիստը նշանակվեց դեկտեմբերի 20-ին:
Ռուզան ՄԻՆԱՍՅԱՆ
