Քիչ առաջ Երեւանի ոստիկանապետ Աշոտ Կարապետյանը Սախարովի հրապարակի մոտակայքում բանակցեց երեք ակտիվիստի հետ եւ առաջարկեց, որ բոլոր բերման ենթարկված ակտիվիստները ազատ կարձակվեն եւ կմիանան իրենց, եթե իրենք դուրս գան Սախարովի հրապարակից եւ խաղաղ երթը շարունակեն այլ ուղղությամբ:
Ակտիվիստները քննարկեցին առաջարկը, ոմանք ընդդիմացան, ասելով՝ չենք հեռանա, մինչեւ մեր ընկերները չմիանան մեզ, բայց, ի վերջո եկան մի հայտարարի՝ բերման ենթարկված իրենց ընկերներին սպասել Հանրապետության հրապարակի մետրոյի հարեւանությամբ:
Կարդացեք նաև
Այս պահին ակտիվիստները հավաքվել են մետրոյի մոտ եւ սպասում են ընկերներին:
Բացի ակտիվիստներին բերման ենթարկելուց, ոստիկանությունը առգրավել է ակտիվիստների դրոշները, նաեւ պաստառներ:
Որոշ ակտիվիստների ոստիկանները բերման են ենթարկել բռնությունների կիրառմամբ եւ գետնին քարշ տալով:
Այս պահին ոստիկանները կրկին շղթա են կազմել մետրոյի հարեւանությամբ, թույլ չեն տալիս ակտիվիստների տեղաշարժը այս տարածքից: Երբեմն-երբեմն արգելվում է նաեւ ակցիայի հետ կապ չունեցող քաղաքացիների տեղաշարժը, ինչի առիթով լինում են վիճաբանություններ քաղաքացիների ու ոստիկանների միջեւ:
Արփինե ՍԻՄՈՆՅԱՆ
