Դեկտեմբերի 1–ը ամբողջ աշխարհում նշվում է որպես ՁԻԱՀ–ի դեմ պայքարի համաշխարհային օր։ Այդ առիթով այսօր Հայկական կարմիր խաչ ընկերությունը, մանկավարժական համալսարանի ուսանողական խորհրդի հետ համատեղ, ՁԻԱՀ–ի դեմ կազմակերպած միջոցառման ընթացքում շրջել են լսարաններով՝ տեղեկություն տրամադրելով ՄԻԱՎ/ՁԻԱՀ–ի մասին, ինչպես նաև, կոչ արել ուսանողներին միանալ իրենց պայքարին՝ կրելով պայքարի խորհրդանիշ դարձած կարմիր ժապավենը։
Կարմիր խաչ ընկերության կամավոր Արմինե Սերոբյանը, կոչ անելով ուսանողների միանալ իրենց պայքարին, նշեց, որ այսօր ավելացել է այն մարդկանց թիվը, որոնք հանձնում են բժշկական անալիզ՝ իմանալու համար արդյոք առկա՞ է իրենց մոտ վարակ։ Սա ըստ Ա. Սերոբյանի , միանշանակ վկայում է այն մասին, որ մարդկանց մոտ ավելացել է տեղեկատվությունը այս հիվանդության մասին։
Ինչ վերաբերվում է այն փաստին, որ մարդիկ այսօր շատ հաճախ խուսափում են շփվելուց ՄԻԱՎ/ՁԻԱՀ–ի վարակակիրների հետ, ապա ՀԿԽ երիտասարդական բաժնի հոգեբան Նաիրա Երկանյանը Aravot.am-ի թղթակցի հետ զրույցում նշեց, որ հիմա զգալիորեն նվազել է այդպիսի մարդկանց թիվը հասարակության մեջ և իրենց այժմյան ծրագրերը ուղղված են դրան։ Իրենք փորձում են հիվանդության մասին հասարակությանը հստակ տեղեկատվություն տալու միջոցով հասնել նրան, որ վարակակիրների հետ շփումից խուսափող մարդիկ այլևս չլինեն։
Զառա ԱՍԿԱՐՅԱՆ
