Քիչ առաջ ՀՅԴ-ական պատգամավոր Արծվիկ Մինասյանն ու ԲՀԿ-ական պատգամավորներ Նաիրա Զոհրաբյանը եւ Տիգրան Ուրիխանյանը ԱԺ քարտուղարություն ներկայացրեցին ձեւաթուղթը, համաձայն որի` պարտադիր կուտակային կենսաթոշակային համակարգի ներդրման մասին հայտարարությունը իմպերատիվ կարգով կներառվի ԱԺ քառօրյայի օրակարգ եւ կքննարկvի: Ձեւաթղթի տակ ստորագրել է 49 պատգամավոր: «Մենք շատ լավ գիտենք, թե ի՞նչ նպատակով են իրենք դա անում եւ լիագումար նիստում մեր կարծիքները կհնչեցնենք»,- Aravot.am-ի հետ զրույցում ասաց Նաիրա Զոհրաբյանը:
Պատգամավորները պարզաբանեցին, որ օրենսդրական որեւէ սողանցք չկա, որ քաղաքական մեծամասնությունը մերժի այս քննարկումը:
Ի դեպ, այսօր այդ հարցով ակցիա է լինելու նաեւ ԱԺ-ի մատույցներում: Հետաքրքրվեցինք`պատգամավորներն ակցիայի կազմակերպիչների հետ համաձայնեցվա՞ծ են գործում: Տիկին Զոհրաբյանն ասաց. «Իրենք իրենց գործն են անում: մենք պարբերաբար հանդիպում ենք նախաձեռնող խմբի հետ, լսում ենք իրենց լրացուցիչ առաջարկները, որոնք փորձում ենք ներառել մեր առաջարկների մեջ: Բայց իրենք իրենց իրավունքներն ու շահերն են պաշտպանում, մենք էլ այստեղ ենք փորձում դա անել»:
Մանրամասները`տեսանյութում
Կարդացեք նաև
Ի դեպ, ՀՀԿ խմբակցության ղեկավար Գալուստ Սահակյանը, մեր տեղեկություններով, հեգնել էր ընդդիմադիր պատգամավորներին, թե չեն հաջողի հավաքել անհրաժեշտ քանակի ստորագրությունները: Այսօր Aravot.am-ի հարցին ի պատասխան, պարոն Սահակյանը տարակուսեց. «53 ընդդիմադիր պատգամավոր են: 44 ստորագրություն ամոթ էլ էր որ չհավաքեն: Բայց պիտի նաեւ մտածեն`կարողանալո՞ւ են»:
Պարոն Սահակյանն ասաց նաեւ, որ քաղաքական մեծամասնությունը շարունակելու է իր մերժողական կեցվածքը, քանի որ, իր համոզմամբ տասնամյա քննարկումները տվել են իրենց դրական արդյունքը եւ այժմ ոչինչ չի խանգարում, որ համակարգը ներդրվի: Իսկ ընդդիմությունը, իր կարծիքով, «շոու է անում». «Իրենք ուզում են իրենց անհագ ցանկությունների մասին խոսեն, որ մարդիկ լսեն: Բնական է`դեմ ենք լինելու: Իրենք իրենց իրավունքներով քննարկելի կդարձնեն, մենք է լ մեր իրավունքներով դեմ կլինենք: Իրենք էլ գիտեն, որ դեմ ենք լինելու, պարզապես, որպես շոուի մասնագետներ, իբրեւ թե հանրային կարծիք ձեւավորելու համար էդ ճանապարհն են ընտրել: Իսկ մենք էլ, շատ վճռական ձեւով, բնականաբար, մեզ համար ընդունելի չի լինելու»:
Սահակյանը համամիտ չէ, որ հասարակությունն էլ է դեմ, նա կարծում է, որ հասարակությունը բազմաշերտ է ու ամենադրական գործընթացներին անհատների մի խումբ կարող է դեմ լինել: Նա դա էլ դրական երեւույթ է համարում ու չի կարծում, որ հասարակության բոլոր անդամները պետք է համաձայն լինեն`նոր կիրառվի, քանի որ քաղաքական մեծամասնությունն իր վրա է վերցնում պատասխանատվությունը:
Նելլի ԳՐԻԳՈՐՅԱՆ
Գալուստ Սահակյանը երբ ա խելքը գլխին բան ասել որ հիմա ասի… էդ էն պատգամավորն ա, որի մասին հաստատ կարելի է ասել` “լավ է լռել քան խոսալ”