Այս ամիս մարզական լրագրողները բաց ու թափանցիկ քվեարկությամբ կորոշեն մրցաշրջան 2013-ի Հայաստանի 10 լավագույն մարզիկներին: Օրերս ՀՀ սպորտի եւ երիտասարդության հարցերի նախարարությունում հրավիրված լավագույն տասնյակն ընտրելու կարգի շուրջ քննարկման ժամանակ որոշվեց, որ թեկնածու մարզիկների ցուցակը կազմելու եւ ներկայացնելու է սպորտի պետական կառույցը, իսկ տասնյակի ընտրությունը, ինչպես միշտ, կատարելու են մարզական լրագրողները
: Ցուցակի վերջնական տարբերակը դեռ պատրաստ չէ, միջազգային կարեւորագույն պաշտոնական մրցումներն էլ դեռ չեն ավարտվել: Բայց, կարծես թե, Հայաստանի 2013 թվականի թիվ 1 մարզիկի ամենահավանական թեկնածուի անունը հիմա էլ պարզ է: Խոսքը ազատ ոճային ըմբիշ, աշխարհի ու Եվրոպայի չեմպիոն, Համաշխարհային ուսանողական խաղերի արծաթե մեդալակիր Դավիթ Սաֆարյանի մասին է: Ու, չնայած, դեռ պետք է սպասել քվեարկության արդյունքների ամփոփմանը, Aravot.am-ը զրուցեց նրա հետ:
– Դավիթ: Շատ մեծ հավանականություն կա, որ դու ճանաչվես Հայաստանի 2013 թվականի լավագույն մարզիկ: Նման բան մտածե՞լ ես:
– Չէ: Մտքովս էլ չի անցել: Թեեւ դա իմ կյանքի երազանքներից մեկն է եղել: Բայց Հայաստանի շատ մարզիկներ կան, որ այս տարի բարձր արդյունքներ են ցույց տվել:
Կարդացեք նաև
– Քոնն ամենաբարձրն է:
– Եթե ինձ ճանաչեն, երջանիկ կլինեմ՝ իմ եւ իմ երկրի համար:
– Կարծում եմ՝ գիտակցում ես, որ դա նաեւ լրացուցիչ պատասխանատվության բեռ է:
– Բնականաբար: Գիտե՞ք, առաջ պատասխանատվության զգացումը մի տեսակ ծանր բեռի էր նման: Բայց ժամանակի ընթացքում դա ամենօրյա զգացում դարձավ եւ սովորեցի:
– Հիմա Կրասնոդարում ես: Դեռ շարունակում ես հանգստանա՞լ:
– Հանգստանում էի աշխարհի առաջնությունից հետո: Բայց մարզումներս արդեն վերսկսել եմ: Եկող տարի էլ ծանր մրցումներ ունեմ՝ աշխարհի, Եվրոպայի առաջնություններ, միջազգային բազմաթիվ մրցաշարեր: Պետք է լավ մարզավիճակում դրանց ներկայանամ:
– Ասում են՝ չեմպիոնական տիտղոսը պահպանելն ավելի դժվար է, քան նվաճելը:
– Իհարկե: Չեմպիոնի դեմ ավելի տրամադրված են գոտեմարտում: Մարզիչներս արդեն այսօրվանից ինձ այդ են ասում: Պիտի պատրաստ լինեմ ամեն ինչի:
– Հաճա՞խ ես գալիս Հայաստան:
– Շատ հաճախ: Երեւանն իմ սիրելի քաղաքն է: Ամեն Նոր տարի դիմավորում եմ Հայաստանում: Բացի դա, միշտ գալիս եմ հավաքականի ուսումնամարզական հավաքներին:
– Կյանքիդ գլխավոր մարզական նպատակը:
– Պարզ չէ՞. օլիմպիական ոսկին, որի մասին երազել եմ մանկուց: – Շնորհակալություն հարցազրույցի համար: Կհանդիպենք Երեւանում:
– Ես էլ եմ շնորհակալ: Կհանդիպենք:
Աշոտ ՀԱԿՈԲՅԱՆ
