Վարչապետ Տիգրան Սարգսյանը «Թեքեյան մշակութային կենտրոն»–ում հանդիպել է Ռուսաց լեզվի կենտրոններում վերապատրաստում անցած մանկավարժներին: Տիգրան Սարգսյանը կարևորել է ուսուցիչների վերապատրաստման գործընթացը, ինչը հնարավորություն է տալու դպրոցներում բարձրացնել ռուսերենի իմացության մակարդակը: «Այսօր տեսնում ենք, որ պետական ապարատում օտար լեզուների իմացությունն էապես բարձրացնում է մեր աշխատակիցների արտադրողականությունը, և հակառակը. կարող ենք նշել. որ եթե մարդը տիրապետում է ընդամենը մեկ լեզվի, ապա ունենում ենք լրջագույն խնդիրներ: Արագ փոփոխվող աշխարհում, որն արագորեն դառնում է շատ փոքր, շփումներն ունեն էական նշանակություն, մանավանդ փոքր պետությունների համար, որովհետև ինտեգրացիոն գործընթացները բարձրացնում են մեր տնտեսության, հասարակության մակարդակը»,- ասել է վարչապետը:
Տիգրան Սարգսյանի խոսքով՝ եվրոպական երկրներում առնվազն երկու օտար լեզվի իմացությունն այսօր դառնում է պարտադիր, որովհետև շփումներն այնքան ինտենսիվ են, որ դրանց իմացությունը յուրաքանչյուր քաղաքացու համար դառնում է անհրաժեշտություն:
Տիգրան Սարգսյանի դիտարկմամբ՝ այդ խնդիրն արդիական է նաև ՀՀ-ի համար: «Օտար լեզուների դասավանդումը մեզ համար լինելու է առաջնահերթություն, որովհետև այդ ճանապարհով կարող ենք ապահովել մեր երկրի առաջընթացը: Ուսուցիչների վերապատրաստումը ծառայում է հենց այդ գործին, որովհետև ձեր դասավանդման պրակտիկան, նոր մեթոդները բնականաբար նպաստելու են, որպեսզի կարողանանք դպրոցներում բարձրացնել լեզվի իմացության մակարդակը: Այդ գործին է ծառայում նաև Խաչատուր Աբովյանի անվան հայկական պետական մանկավարժական համալսարանը, որն իր ծրագրերում ավելի մեծ ուշադրություն է սկսել դարձնել հենց այդ խնդրի լուծմանը»,- նշել է կառավարության ղեկավարը:
Ռուսաց լեզվի կենտրոններում վերապատրաստման դասընթացներին մասնակցել են հանրապետության բոլոր մարզերի 137 ուսուցիչներ: Դասընթացներն անցկացվել են Մոսկվայի Պուշկինի անվան լեզվաբանության ինստիտուտի մասնագետների կողմից: Մանկավարժներից մի քանիսին վերապատրաստման վկայականները հանձնել է անձամբ վարչապետ Սարգսյանը:
Կարդացեք նաև
ՀՀ կառավարություն
Հանկարծ այնպես չլինի, որ հայերենը լինի մեզ համար առաջնահերթություն….