ՏՄՊՊՀ-ի (Տնտեսական մրցակցության պաշտպանության պետական հանձնաժողով) որոշումը բողոքարկելո՞ւ է, թե՞ ոչ, Aravot.am-ի հարցին, «Nout.am»-ի տնօրինությունը պատասխանեց, որ դեռ չի որոշել, բայց հանձնաժողովին ու լրատվամիջոցներին շնորհակալություն է հայտնում իրենց ընկերության անվճար գովազդն ապահովելու համար, քանի որ ՏՄՊՊՀ-ի որոշումը տարածելով՝ հազարավոր մարդիկ իմացան, որ իրենց մոտ մրցակից ընկերությունից գներն ավելի ցածր են:
Aravot.am-ի հետ զրույցում Ներսես անունով ներկայացած տնօրենն ասաց, որ չի ցանկանում, հանձնաժողովի որոշման մասին կարծիք հայտնել, քանի դեռ պաշտոնապես չի ստացել որոշման փաստաթուղթը:
Նշենք, որ այսօր հանձնաժողովը տուգանել է նաեւ «Nout.am»-ին` ասելով, որ այս ընկերությունն իր մրցակից ընկերության վարկանիշի հաշվին գովազդել է իրեն: Ըստ ՏՄՊՊՀ-ի «Էյջ Թի Էլեքթրոնիքս» ընկերությունը դիմել է հանձնաժողովին՝ հայտնելով, որ մրցակից՝ «Nout.am» ընկերությունը համացանցում տեղադրել է վարկաբեկող տեղեկատվության իրենց պատկանող «Ռիչ Քոմփյութերս» ապրանքանիշի վերաբերյալ: Մասնավորապես` «Nout.am»-ը տարածել է, որ իբր հաճախորդներից մեկը միջին որակի նոութբուքը «Ռիչ Քոմփյութերս»-ից գնել է 365 000 դրամով, մինչդեռ այն իրենց մոտ արժե 209 000 դրամ:
««Nout.am»-ի վարքագիծը ակնհայտորեն հակասում է օրենսդրությանը: Հանձնաժողովի պահանջով գրառումն անմիջապես հանվել է համացանցից, իսկ ընկերությունը կվճարի տուգանք՝ օրենքի խախտման եւ մրցակից ընկերությանը վարկաբեկելու համար»,-վստահեցրել են հանձնաժողովից:
Կարդացեք նաև
Լուսինե ԲՈՒԴԱՂՅԱՆ
