Օրերս Համաշխարհային բանկը (ՀԲ) զեկույց էր հրապարակել, ըստ որի, Հայաստանում բարձր է մենաշնորհների եւ օլիգոպոլիաների կշիռն ընդհանուր տնտեսության մեջ, եւ այս ցուցանիշը բարձր է ընդհանուր տարածաշրջանի եւ ԱՊՀ երկրների համեմատ: Համաշխարհային բանկի այս վերլուծության վերաբերյալ այսօր լրագրողները տնտեսական մրցակցության պաշտպանության պետական հանձնաժողովի (ՏՄՊՊՀ) նախագահ Արտակ Շաբոյանից պարզաբանում խնդրեցին:
Հանձնաժողովը, որը ըստ էության պատասխանատու է Հայաստանում մոնոպոլ ընկերությունների վարքագծի, կամ գերիշխող դիրքը չարաշահելու եւ տնտեսությունում այլ խախտումներ թույլ չտալու համար, Համաշխարհային բանկի գնահատականների հետ համամիտ չէ:
Շաբոյանը նշեց մի շարք ոլորտներ, որտեղ շուկայում մի շարք ընկերություններ կան, սակայն ՀԲ-ի մատնանշած ամենաբարձր մոնոպոլիզացված շուկային` շաքարավազի եւ վառելիքի շուկային, հանձնաժողովի նախագահը չանդրադարձավ:
Արտակ Շաբոյանը հակադարձեց ՀԲ-ի գնահատականներին՝ ներկայացնելով մրցունակության ինդեքսները, ըստ որի Հայաստանը ԱՊՀ երկրներում առաջատար է: Ըստ պարոն Շաբոյանի. «Գերիշխող դիրք ունեցող տնտեսվարողների ազդեցությունը մրցակցության վրա, հակամենաշնորհային քաղաքականության արդյունավետությունը, եւ ներքին շուկայում տեղական մրցակցության ուժգնության ցուցանիշներով ԱՊՀ երկրներում առաջատար ենք»:
Կարդացեք նաև
ՏՄՊՊՀ-ի նախագահի պարզաբանման մանրամասները` տեսանյութում
Հիշեցնենք, որ ՀԲ-ի հրապարակած տվյալներով, հակամենաշնորհային քաղաքականության արդյունավետությունը Հայաստանում բավարար չէ, եւ այն օրենսդրական փոփոխությունների կարիք ունի, մասնավորապես` ՀԲ-ն հարց էր բարձրացրել ՏՄՊՊՀ-ի անկախության խնդրի շուրջ:
Նելլի ԲԱԲԱՅԱՆ
