«Ես` վարչապետի օգնականի իմ պաշտոնը չեմ թողել նրա համար, որ լքել եմ թիմը»,-այսօր «HayNews» մամուլի ակումբում հայտարարեց ՍԴՀԿ նորընտիր ատենապետ, ՀՀ վարչապետի նախկին օգնական Նարեկ Գալստյանը: Ինչպես երեկ տեղեկացրել էինք, Նարեկ Գալստյանը ՀՀ վարչապետի օգնականի պաշտոնից ազատվելու դիմում էր ներկայացրել:
Այսօր լրագրողների հետ հանդիպմանը նա տեղեկացրեց, որ դիմումն արդեն ստորագրված է ու շեշտեց. «Ամենևին թիմը լքելու այդ նախատրամադրվածությունը չկա: Պարզապես այդ պաշտոնների համատեղումը շահերի բախման է բերում և հակասում կուսակցության կանոնադրությանը` համաձայն որի` նշանակովի պաշտոն ունեցող անձը չի կարող լինել ղեկավար մարմնում»:
ՍԴՀԿ ղեկավար մարմնում կատարված փոփոխությունների համաձայն` ՍԴՀԿ փոխատենապետն է Վազգեն Մեսրոպյանը, ատենադպիրն է Հարություն Բալաբանյանը:
Հիշեցնենք, որ վերջին շրջանում Հնչակյան կուսակցության ներսում տարաձայնություններ կային, խնդիրներ էին առաջացել կնիքի հետ կապված և այլն: Նարեկ Գալստյանն այս կապակցությամբ հայտարարեց. «Կուսակցության վարչության որոշում կա` չանդրադառնալ նախկին խնդիրներին, որոնք առնչվում են կուսակցությունից վտարված անձանց: Այս էջը մեզ համար փակ է: Բավական է զբաղվել անցած խնդիրներով, դեռ հսկայական անելիքներ ունենք: Մենք շարունակում ենք լինել միակամ: Ինչ վերաբերում է դատական գործերին` կնիքի հետ կապված, ապա դրանք բոլորը վերջացած են»:
Կարդացեք նաև
Նորընտիր ատենապետը խոստովանեց, որ վերջին տարիներին կուսակցությունը բավականին թույլ է եղել ու հավաստիացեց, որ այսօր ՍԴՀԿ-ն միակամ է և նետվում է քաղաքական դաշտ`ունենալով իր տեսլականը օլիգարխիայի, մենաշնորհի դեմ պայքարում և կանգնած է լինելու ՀՀ շարքային քաղաքացու կողքին:
Նարեկ Գալստյանը նշեց նաև, որ Վահան Շիրխանյանն իրենց ավագ ընկերն է ու խորհրդատուն:
Խոսելով արտաքին քաղաքականության ոլորտում կուսակցության կողմնորոշումների մասին` ատենապետն ասաց. «Հնչակյան կուսակցությունը զգուշավոր լավատեսությամբ ողջունում է ՀՀ իշխանությունների որոշումը` անդամակցել Մաքսային միությանը, բայց նաև հույս հայտնում, որ Եվրոպայի հետ համագործակցությունը չի դադարելու: Վերջիվերջո կա անվտանգության խնդիր, իսկ պատերազմի սպառնալիքը ենթադրում է իր կանոնները և մոտեցումները խնդիրներին: Այս տեսանկյունից Մաքսային Միությունը թերևս այլընտրանք չունեցող միություն է»:
Տաթև ՀԱՐՈՒԹՅՈՒՆՅԱՆ
