ՀՀ գլխավոր դատախազությունն առաջիկա օրերին պատշաճ ընթացք կտա շուրջ մեկ ամիս առաջ ՀՀ գլխավոր դատախազին հասցեագրված սփյուռքահայ գործարար Էդմոնդ Խուդյանի նամակին: Այս մասին օրեր առաջ Սփյուռքահայ ներդրողների շահերի պաշտպանության նախաձեռնությանը հայտնեց ՀՀ գլխավոր դատախազության աշխատակազմի հանրային կապերի վարչության պետ Շահեն Տոնոյանը: Ըստ Շ. Տոնոյանի՝ Էդմոնդ Խուդյանի դիմումում մատնանշված հանգամանքները մանրամասն ուսումնասիրության կարիք ունեին, իսկ նման ծավալի ուսումնասիրությունները դատախազությյունը կատարում է մեկամսյա ժամկետում:
Հիշեցնենք, որ ամերիկահայ գործարարը գլխավոր դատախազ Գեւորգ Կոստանյանին մակագրված իր դիմումով նորանշանակ դատախազի ուշադրությունն էր հրավիրել ներկայումս Երեւանի Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Արշակ Վարդանյանի վարույթում գտնվող գործի վրա, որով առ այսօր դատախազների կողմից հովանավորչություն է իրականացվում Ղեւոնդ Ղալումյանի նկատմամբ: Խոսքը վերաբերում է ինչպես այս գործով ի սկզբանե հսկող դատախազ հանդիսացած Արման Հակոբյանին, այնպես էլ՝ դատական փուլում վերջինիս փոխարինած դատախազ Լեւոն Չարխիֆալակյանին: Նրանց գործողությունների արդյունքում, ճիշտ այնպես, ինչպես շուրջ մեկ տարի առաջ տեղի ունեցած խորհրդակցության ժամանակ նշեց հանրապետության նախագահ Սերժ Սարգսյանը, հանցանք կատարած մի քանի անձինք մեղադրյալի փոխարեն վկայի կարգավիճակում մնացին, իսկ գործարար Էդմոնդ Խուդյանի (վկա) անունը անհիմն դրվեց կեղծ մեղադրանքի կողքին, թեեւ նրան մեղադրանք չի առաջադրվել:
Գործարարը բազմիցս նշել է, որ այս շինծու մեղադրանքի տեքստում ի սկզբանե մի միտում կա. դատախազությունն ամեն գնով հովանավորում է խարդախ գործարքի իրական հասցեատերերին եւ «Էդուարդ Եսայանը գործել է Էդմոնդ Խուդյանի օգտին» զրպարտիչ փաստի արձանագրմամբ դատավճիռ կկայացվի, իսկ այնուհետեւ այն կօգտագործվի Գյուլխասյանին եւ Մաշտոցի 33-ի այլ խաբված գնորդներին իր դեմ ուղղելու համար: Քանի որ Էդմոնդ Խուդյանի կողմից դատախազ Կոստանյանին դիմումն ուղարկվել է հոկտեմբերի 31-ին, առաջիկա օրերին կլրանա նշված մեկամսյա ժամկետը, եւ գործարարը հույս ունի ականատես լինել դատախազության կոնկրետ գործողություններին՝ մատնանշված ապօրինությունների ուղղությամբ: Սակայն ցավալի է, որ դատախազությունը չի փորձում այս գործով ավելի օպերատիվ լինել այն առումով, որ ներկայացված գործով դատարանը գուցե մինչ դատախազության կողմից արձագանքելը ապօրինի մի վճիռ կայացնի:
Հիշեցնենք, որ տուժած գնորդի գործով դատական հաջորդ նիստը նշանակված է նոյեմբերի 29-ին:
Կարդացեք նաև
Սփյուռքահայ ներդրողների շահերի պաշտպանության նախաձեռնող խումբ
