«Փոխադրողների միության» նախագահ Հրանտ Եղիազարյանն այսօր բոլոր փոխադրողների անունից մտահոգություն հայտնեց, որ քաղաքապետարանը չի ցանկանում բարձրացնել տրանսպորտի սակագինը, իսկ իրենք շարունակում են աշխատել վնասով:
«Ելակետ» ակումբում փոխադրող Աշոտ Արշակյանն էլ պնդում էր, որ 2005 թվականից վնասով են աշխատում. «Ազգ ու տակի ունեցվածքը, հարսների ոսկեղենը գրավ ենք դրել, ներդրել , որ լավ լինի: Բայց ոչինչ չի փոխվել»;
Հարցին՝ ինչպե՞ս եք գոյատեւել վնասով աշխատելով, հակադարձեց. «Իսկ Հայաստանը ո՞նց է գոյատեւում արդեն քսաներկու տարի…Մենք օգուտ չենք ունեցել, խոստումներ են տրվել, որ կվերանայվի եւ հարցին լուծում կտրվի… սպասել ենք, բայց ոչինչ չի փոխվել»:
Պարոն Եղիազարյանն էլ ասաց՝ ձմռանը տրանսպորտային միջոցներն անպատրաստ են, փող չունեն անվադողերը, մարտկոցը փոխելու եւ ձմռանը նախապատրաստելու համար մեծ գումարներ են պետք.«Միայն ավտոբուսի համար՝ 580 հազար դրամ»:
Կարդացեք նաև
Նա նաեւ ասաց, որ փոխադրողների համար հարյուր դրամով սպասարկելը մահ է ու ասաց, որ պահանջում են բարձրացնել տրանսպորտի սակագինը, դարձնել 200 դրամ. «150 դրամը կտան ուղեւորները, 50 դրամ էլ դոտացիա, որ տեղավորվենք մեր ափսեի մեջ»:
Նա ասաց, որ տեղեկություն չունի, որ Երեւանի քաղաքապետ Տարոն Մարգարյանը գծատեր է. «Եթե գծատեր է, նա աշխատավարձ է ստանում, ի՞նչ խնդիր ունի»: Հարցին քաղաքապետը միայն աշխատավարձո՞վ է ապրում, ասաց՝ չգիտեմ:
Նա նաեւ վստահեցրեց, որ քաղաքացիների 95 տոկոսը ըմբռնումով է մոտեցել տրանսպորտի սակագնի թանկացմանը:
Արփինե ՍԻՄՈՆՅԱՆ
