«1 միլիոն դրամի տուգանք «Վաղարշ եւ որդիներ» ոսկու առեւտրի կենտրոնի աշխատակիցների նկատմամբ չի եղել»,-Aravot.am-ի հետ զրույցում ասաց էկոնոմիկայի նախարարության շուկայի եւ սպառողների շահերի պաշտպանության պետական տեսչության ղեկավար Լեւոն Խալիկյանը: Հիշեցնենք, որ այսօր կառավարության շենքի մոտ «Վաղարշ եւ որդիներ» ոսկու առեւտրի կենտրոնի աշխատակիցները բողոքի ակցիա էին անում, դժգոհելով, որ իրենց մոտ կատարվող տեսչության ստուգումների տուգանքները շատ բարձր են եւ տեղին չեն. «Տուգանում են, իբր թե հարգադրոշմի վրա ասենք 58 պրոբի 8 թվի մի մասը լավ չի երեւում ու մեծ տուգանքներ գրում: Մեզանից մեկին 500 հազար, մեկին էլ` 1 միլիոն դրամ են տուգանել»:
Ցուցարարները կառավարության ընդունարանում հերթ էին կանգնել, որպեսզի ստորագրեին իրենց դիմում-նամակի տակ. նրանք դիմում են կառավարությանը դադարեցնել ստուգումները, կամ էլ հարգորոշող կնիքը խփող ընկերություններին ստուգել:
Բողոքողներից մեկը Aravot.am-ի հետ զրույցում ասաց. «Պատահում է, որ պրոբը խփում են, զարդը մեջտեղից կիսվում է,կամ վնասվում է, տանում ենք նորից ոսկերիչի մոտ նոր գործ պատվիրում: Կարող է եւ հարգադրոշմը լրիվ չերեւա, դրա համար էդքան մեծ տուգանքներ նշանակե՞ն»:
Տեսչության ղեկավար Լեւոն Խալիկյանն էլ մեզ հետ զրույցում վստահեցրեց, որ «Վաղարշ եւ որդիներ» ոսկու առեւտրի կենտրոնում ստուգումները շարունակվելու են, ինչ վերաբերում է տուգանքներին, ապա պարոն Խալիկյանն ասաց, որ ամենաբարձր տւգանքը եղել է 350 հազար դրամ` 7 կտոր ոսկու համար. «Մինչ օրս 21 կետ ենք ստուգել, մեկ զարդի խախտման տուգանքը կազմում է 50 հազար դրամ»:
Նելլի ԲԱԲԱՅԱՆ
