«Ազատություն» ռադիոկայան. Եվրամիության Արևելյան գործընկերության գագաթնաժողովի շրջանակներում այսօր Վիլնյուսում՝ Լիտվայի արտգործնախարարության շենքում, կայացել է Եվրամիության հետ Վրաստանի Ասոցացման համաձայնագրի տեխնիկական նախաստորագրումը:
«Նովոստի-Գրուզիա» լրատվական գործակալության փոխանցմամբ՝ փաստաթղթի այն մասը, որը վերաբերում է Եվրամիության հետ ասոցացմանը, վրացական կողմից ստորագրել է արտգործնախարարի տեղակալ Դավիթ Զալքալիանին, իսկ ազատ առևտրին վերաբերող մասը՝ էկոնոմիկայի և կայուն զարգացման փոխնախարար Միխայիլ Ջանելիձեն:
Եվրամիության կողմից համաձայնագիրը ստորագրել են ԵՄ-ի արտաքին քաղաքական ծառայության Արևելյան Եվրոպայի, Հարավային Կովկասի և Կենտրոնական Ասիայի հարցերով դեպարտամենտի ղեկավար Գունար Վիգանդը և Եվրահանձնաժողովի առևտրի հարցերով գլխավոր դեպարտամենտի ստորաբաժանման ղեկավար Ֆիլիպ Կուիսոնը:
Փաստաթուղթը բաղկացած է 1000 էջից:
Կարդացեք նաև
Դավիթ Զալքալիանին այսօրվա օրը պատմական է որակել՝ նշելով, որ Վրաստանի եվրաինտեգրման գործընթացը անդառնալի բնույթ է ստանում:
Նախաստորագրման պաշտոնական արարողությունը տեղի կունենա վաղը՝ փաստաթուղթը խորհրդանշական կերպով կստորագրի Վրաստանի արտգործնախարար Մայա Փանջիկիձեն:
Վրացական կողմը ակնկալում է, որ համաձայնագիրը վերջնականապես կստորագրվի 2014 թվականի սեպտեմբերին:
