«Սևանա լճի մակարդակի բարձրացումը բերում է միայն ավելի խորը թափանցելիության, մնացած բոլոր ցուցանիշները վատթար վիճակում են», – այս մասին նշեց ջրային ռեսուսների գծով փորձագետ, տեխնիկական գիտությունների թեկնածու Քնարիկ Հովհաննիսյանը՝ բաց հասարակական բանավեճի ժամանակ, որը տեղի ունեցավ երեկ՝ Կովկասի ինստիտուտի գրասենյանկում՝ Կովկասի ինստիտուտի կողմից Հարավային Կովկասում Հայնրիխ Բյոլի անվան հիմնադրամի աջակցությամբ և նրա հետ համատեղ։ Նա նշեց, որ հարակից բնակավայրերի աղբը լցվում է Սևանա լիճ, որը բերում է վիճակի վատթարացման: Ըստ փորձագետի՝ որպեսզի Սևանա լիճը խմելու ջրի աղբյուր լինի ռեգիոնի համար, դեռ շատ խնդիրներ պետք է լուծվեն։ Նա հավելեց , որ այս վիճակին նպաստում են նաև Սևանա լճից ջրի բացթողումները։
Ք. Հովհաննիսյանի պնդմամբ՝ Սևանա լիճն ունի ինքնամաքրման շատ մեծ հատկություն, ուղղակի պետք է մոտովորապես 3 տարի լիճը թողնել հանգիստ՝ չաղտոտել, այս դեպքում Սևանը բնական ճանապարհով կենթարկվի ինքնամաքրման։
Հիդրոէկոլոգիայի և ձկնաբանության ինստիտուտի հիդրոբիոլոգիայի բաժնի ղեկավար Սուսաննա Հակոբյանը նշում է, որ իրենք գրանցել են մաքսիմալը 12 մ թափանցելիություն, ինչը, ըստ նրա, շատ բարձր ցուցանիշ է։ Ս. Հակոբյանը լուրջ խնդիր է համարում այն, որ Սևանի էնդեմիկ ձկնատեսակները այսօր գտնվում են ոչնչացման եզրին։ Այդ հարցը լուծվում է արհեստական ճանապարհով ՝ մանրաձկներ լիճ բաց թողելու եղանակով։
Սևանի ազգային պարկի փոխտնօրեն Վահե Գուլանյանը նույնպես հայտնեց իր մտահոգությունն այս հարցի շուրջ՝ նշելով , որ Սևանա լճի էնդեմիկ ձկնատեսակի ոչնչացմանը մեծապես նպաստում է որսագողությունը։ Նա նշեց, որ որսագողության համար օրենքով նախատեսված է քրեական եւ վարչական պատասխանատվություն, եւ տեղեկացրեց, որ ձկնագողության համար 20 մարդ ենթարկվել է պատասխանատվության, որից 4–ը ՝ քրեական պատասխանատվության։ Բայց, ըստ Վ. Գուլանյանի, չնայած օրենքի սահմանած պատժի առկայության՝ հնարավոր չէ ընդհանարապես վերացնել որսագողության երևույթը։
Կարդացեք նաև
ՀՀ բնապահպանության նախարարության կենսառեսուրսների կառավարման գործակալության կենդանական ռեսուրսների բաժնի պետ Սևակ Բալոյանը նշեց, որ Սևանա լիճ է բաց թողնվել 370.000 մանրաձուկ՝ էնդեմիկ տեսակները վերականգնելու նպատակով , ինչպես նաև 2014–2023 թվականներին իրականացվելու է անտառատնկում, որը, ըստ նրա, կնպաստի Սևանա լճի խնդիրների լուծմանը։
Զառա ԱՍԿԱՐՅԱՆ
