Այսօր ՀՀ վարչապետ Տիգրան Սարգսյանը մի քանի նախարարների ու փոխնախարարների ուղեկցությամբ շրջեց Գյումրու բոլոր վարչական շենքերում`կողմնորոշվելու, թե դատարկ մնացած որ կառույցը ում է տրամադրելու, իսկ գործող հիմնարկները ինչպես է տեղահանելու, որպեսզի դրանց շենքերն էլ օգտագործի այլ նպատակի համար: Մի կառույցից մյուսը շրջայց կատարող վարչապետի հետևից գյումրեցիները փսփսում էին` «Ահա` եկավ, հիմա էս շենքն էլ ռուսներին կտրամադրի, կպրծնենք»: Գյումրեցիները հատկապես անհանգստացած են Գյուլբենկյանի անվան վիրաբուժական հիվանդանոցի դատարկ շենքը ռուսներին տրամադրելու լուրերով:
Երբ հերթը հասավ Գյումրու քաղաքապետարանի նախկին շենքին, պարզվեց, որ այստեղ տեղակայված մի քանի հիմնարկներ ուզում են տեղահանել, որպեսզի այն տրամադրեն ոստիկանությանը: Այստեղ գործող որակի տեսչության հին մասնագետներից մեկը`Ռոբերտ Պողոսյանը, լրագրողներին դժգոհեց . «Այս կառույցը կառուցել է Մոսկվան, 1989 թվականին երկրաշարժից հետո լրիվ վերականգնեցին,սա հատուկ շենք է, մենք համաձայն չենք, որ սա ոստիկաններին տրամադրվի: Գիտե՞ք` քանի նախարարությունների աշխատակիցներ կան այստեղ: Այս շենքը հատուկ շենք է, այստեղ լաբորատորիաներ կան, փորձարկումներ ենք կատարում,և կառույցը դիմանում է տատանումներին: Մոտավորապես 7 կառույց կա այստեղ` տրանսպորտի տեսչությունը, անտառտնտեսությունը, քաղաքաշինության վարչությունը, տեխնիկական գրադարանը… Չգիտենք՝ ո՞ւր են մեզ առաջարկելու, ուր էլ տեղափոխեն, մենք բողոքելու ենք: Եթե վերցրեցին, այս շենքը դառնալու է ոստիկանության շենք: Մենք համաձայն չենք , մենք պատրիոտ ենք, ո՞նց կարող են այս շենքը տալ էնպիսի կառույցների, որոնք էն չեն, ինչ- որ լաբորատորիաներն են: Այստեղ Շիրակի մարզի բոլոր ստուգումներն ու փորձաքննություններ են անցկացվում` և որակական, և անվտանգության: Հանցագործություն է այս շենքը տալ ոստիկաններին: Մենք պայքարելու ենք մինչև վերջ»:
Վարչապետը լրագրողների հետ զրույցում հաստատեց, որ շենք է փնտրվում ոստիկանության համար, պետական սեփականություն հանդիսացող շենք-շինությունները օպտիմալ են կառավարելու. այն կառույցները, որոնք վարձակալական հիմունքներով են աշխատում, տեղափոխելու են պետական սեփականություն հանդիսացող շենքեր:
«Մենք ունենք 3 մեծ տարածքներ, որոնք հանդիսանում են պետական սեփականություն և պետք է որոշում կայացնենք, թե էդ շենքերը ո՞ւմ է նպատակահարմար հատկացնել, ո՞ր պետական գերատեսչությունը տեղակայել: Գյումրի քաղաքում տեղակայված ոստիկանությունը էս պահի դրությամբ զբաղեցնում է 4 տարածք և իրենք ցրված են տարբեր կետերում, ընդ որում մի մասը վարձակալական հիմունքներով, մյուս մասի տարածքը հարմար չէ: Հիմա գնահատում ենք, թե ավելի նպատակահարմար տարածքը ոստիկանության համար ո՞րը կարող է լինել, քանի որ մենք ունենք պետական տարածքներ»,- ասաց վարչապետը:
Կարդացեք նաև
Նշենք, որ օրեր Գյումրու քաղաքապետ Սամվել Բալասանյանն էլ Անի թաղամասում տարածք հատկացրեց ոստիկաններին, սա դրվեց ավագանու նիստի քննարկմանը, բացի այդ, ոստիկանության համար նոր շենք կառուցվեց Գյումրիում: Երևի սա է պատճառը, որ վարչապետը դեռ ոտքը Գյումրիից չքաշած`գյումրեցիները նրա հետևից սկսեցին խոսել. «էս մարդը կպած ուզում է Գյումրին կամ ոստիկանական, կամ ռուսական քաղաք դարձնել»:
Նունե ԱՐԵՎՇԱՏՅԱՆ
