Նոյեմբերի 17-ին Տավուշի մարզի Աչաջուր գյուղում կայացան համայնքի ղեկավարի, իսկ մարզի 7 այլ համայնքներում՝ ավագանու ընտրություններ: Տավուշի մարզպետարանի ինտերնետային կայքը(tavush.gov.am) նոյեմբերի 19-ին տեղեկատվություն է հաղորդել կայացած ընտրությունների արդյունքների մասին, հրապարակել ընտրվածների անունները: Ըստ մարզպետարանի կայքի՝ սահմանամերձ Բերդավան գյուղում ավագանու նորընտիր 9 անդամների թվում է Արտո Ղազարյանը:
Բերդավանի բնակիչները մեզ ահազանգեցին, որ վերջինս իրականում ավագանու անդամ չի ընտրվել,մարզպետարանի կայքի տեղեկատվության մեջ, ավագանու նորընտիր անդամների շարքում բացակայում է Լյովա Ազատյանի անունը: Մենք զանգահարեցինք Տավուշի մարզի թիվ 40 ընտրատարածքային ընտրական հանձնաժողով: Հանձնաժողովից հաստատեցին, որ Արտո Ղազարյանը ավագանի չի ընտրվել, իսկ Լյովա Ազատյանն ընտրվել է:
Մարզպետարանի կայքի տեղեկատվության սխալը բերդավանցիների շրջանում զարմանքի եւ տարաբնույթ խոսակցությունների տեղիք է տվել: Մարզպետարանի լուրի մեջ առկա թյուրիմացությունը մինչ օրս չի ուղղվել:
Ոսկան ՍԱՐԳՍՅԱՆ
