«Աիդան ո՞վ է, որ գա ու մի բան էլ մեր վրա մուննաթ գա»,- այսօր նախագահական նստավայրից դուրս գալուց հետո նստավայրի նամակների ընդունման բաժնի աշխատակցուհուց բողոքում էին ազատամարտիկ կանայք:
Հիշեցնենք, որ այսօր Բաղրամյան 26-ում անցկացվող բողոքի ցույցի ժամանակ երեք ազատամարտիկ կանանց հրավիրեցին նստավայր` իրենց պահանջները լսելու: Բայց ՀՀ նախագահի հետ հանդիպման ակնկալիքով գնացած կանայք հետ եկան հիասթափված. նրանց դիմավորել էր Աիդան, ոչ թե ՀՀ նախագահը:
«Ամո’թ քեզ, պարոն նախագահ, դու երկրապահ չես եղել, երկրապահի անունն ես պղտորում»,- բարկացավ ազատամարտիկ Արեւհատ Մարտիրոսյանը, հետո դժգոհեց, որ հինգ ամիս Ազատության հրապարակում` էլ նստացույց, էլ հացադուլ արեց, բայց ՀՀ նախագահի սիրտն ու հոգին չշարժվեց. «Բայց ոչ մեկ չմոտեցավ, որ հարցներ` ի՞նչ եք ուզում… դու նախագահ լինելու իրավունք չունես, քո ճանապարհը ուրիշ երկրում է, գնա էս երկրից»:
Ելույթ ունեցող կնոջից այն կողմ էլ վիճում էին ցուցարար կանայք ու Երեւանի փոխոստիկանապետը:
«Մենք չենք տեսնում, որ ոստիկանը ժողովրդի կողքին է, մեզ հետ է»,- դժգոհում էր կինը:
Պարոն Օսիպյանն էլ հարցրեց. «Տարբերությունը չե՞ք տեսնում»:
«Վովայի՞ ասած տարբերությունը, բարեփոխումները տեսնում եմ, ավելի վատանում ենք, ավելի աղքատանում… եթե Վովա Գասպարյանը իրեն հրեշտակի թեւեր է պատկերացնում, դրա տակը ես հրեշ եմ տեսնում, հո աղոթելով չէ, ինքը քրիստոնյա չէ»:
Արփինե ՍԻՄՈՆՅԱՆ
Մանրամասները` շուտով տեսանյութում
