«Մենք պահանջում ենք, որ ՀՀ նախագահ Սերժ Սարգսյանի՝ ՀՀ Մաքսային միությանն անդամակցելու որոշումը ճանաչվի ոչ իրավաչափ»,-այսօր «Մեդիա կենտրոնում» հրավիրված մամուլի ասուլիսին հայտարարեց ՀՔԱ Վանաձորի գրասենյակի ղեկավար Արթուր Սաքունցը: Նա անդրադարձավ Մաքսային միությանն անդամակցելու որոշման դեմ իրենց կողմից ներկայացված հայցադիմումի հիմնավորումներին ու տեղեկացրեց, որ ծավալուն հայցադիմում են ներկայացրել:
Որպես իրենց հայցով դիմելու հիմնավորում՝ պարոն Սաքունցը համարում է այն, որ ՀՀ իշխանությունները տարիներ շարունակ խոսում էին եվրաինտեգրման մասին, այնինչ մեկ ամսվա ընթացքում ակնհայտորեն փոխվում է իշխանությունների պահվածքը:
Պարոն Սաքունցը, հղում կատարելով մարդու հիմնարար իրավունքներին, ասաց. «Քաղաքացիները հավասար իրավունքներ պիտի ունենան որոշումների ընդունման հարցում, իրավական պետությունում իշխանության գործունեությունը պիտի լինի հրապարակային: Այնինչ Սերժ Սարգսյանի հայտարարությունը, որից հետո բխել են կառավարության գործողությունները, թափանցիկ չեն եղել:Սերժ Սարգսյանի որոշումը նաև պատճառաբանված չէ, որոշումը պիտի բխի ժողովրդի շահերից, այնինչ այդ որոշմամբ վատթարացում է տեղի ունենում, երբ ՀՀ-ի կողմից որոշում է կայացվում Մաքսային Միությանն անդամակցել՝ ի տարբերություն ասոցացման պայմանագրի:Սերժ Սարգսյանն առավելագույն զգույշ չի գործել, այնպիսի որոշում է կայացրել, որից բխում են բազմաթիվ բացասական հետևանքներ»:
Արթուր Սաքունցը նշեց, որ այսօր դիմել են վարչական դատարան, որպեսզի այն ոչ իրավաչափ ճանաչի ՀՀ նախագահ Սերժ Սարգսյանի գործողությունը:
Կարդացեք նաև
Aravot.am-ը հետաքրքրվեց՝ Սերժ Սարգսյանն ինչպիսի՞ պատասխանատվության պիտի ենթարկվի: Պարոն Սաքունցը պատասխանեց. «Դեռ պատասխանատվության հարցը չենք դնում, կարևորում ենք, որ նախ ՀՀ նախագահի գործողությունը ճանաչվի ոչ իրավաչափ, այնուհետև պետք է գնահատվի, թե ինչ վնասներ է հասցրել այդ որոշումը: Ու միայն դրանից հետո կդրվի պատասխանատվության հարցը»:
Տաթև ՀԱՐՈՒԹՅՈՒՆՅԱՆ
Մալադեց Սաքունց, տենց կամաց կամաց գազ տու: