«Ռուսական ռազմաբազայի ընդլայնումը ՀՀ ազգային շահերի ծիրի մեջ է»,-այսօր «Հենարան» մամուլի ակումբում, խոսելով Ռուսաստանի 102-րդ ռազմաբազայի ընդլայնման մասին, այսպիսի կարծիք հայտնեց քաղաքագետ Լևոն Շիրինյանը:
Նա շեշտեց, որ պետք է լավ սահմանենք, թե մեր ազգային, քաղաքական շահը որն է: Այնուհետև ասաց. «Նախիջևանի թարախապալարը պետք է վերացվի: Գորշ գայլը թափանցել է, ոտք դրել Արաքսից այս կողմ: Թուրքիան ներկա է Նախիջևանում, որի իրավունքը չունի»:
Պարոն Շիրինյանի կարծիքով՝ այժմ Ռուսաստանի ակտիվության շրջանն է, որի հետ վեճ չկա: Նա նկատեց. «Չինաստանը և այլ երկրներ չեն վիճում, միայն Եվրամիությունն է պոչ խաղացնում, բայց կանցնի»:
Պարոն Շիրինյանը զգուշացնում է, թե պետք է ՌԴ-ի հետ պայմանագրերում զգույշ լինենք: Նա նշեց. «Համագործակցությունը պիտի նորմալ լինի: Եթե պայմանագրերի հարցում զգույշ չլինենք, ապա տանուլ կտանք, դա է ցույց տալիս պատմությունը: Բոլշևիկների փորձը չպիտի կրկնենք՝ ռուսին նվիրենք ամեն ինչ, Հայաստանը մնա առանց ոչինչ»:
Պարոն Շիրինյանը շեշտեց, թե «ՌԴ-ն երբեք ճգնաժամային պահերին Հայաստանի հետ չի եղել»:
ՀՆԽ հետախույզ Վովա Վարդանովը կասկածներ ունի կապված ռուսական ռազմաբազայի հետ. «Օսեթիայի վրա հարձակման ժամանակ ռուսական խաղաղարար ուժերի մի խումբ պաշտպանում էր համարյա ինքն իրեն: Խաղաղ բնակիչներին, որոնց պետք է պաշտպանեին, չէին պաշտպանում: Ինչքանո՞վ ենք համոզված, որ նման բան մեզ հետ տեղի չի ունենա:ն Եթե հույսներս միայն իրենց վրա դնենք, ճաշներս կերանք: Չեմ հավատում, որ այս հինգ հազար հոգին, որի կեսը հայեր են, կարող են իրենց գործն անեն»:
Կարդացեք նաև
Պարոն Վարդանովը չհամաձայնեց Լևոն Շիրինյանի հետ այն հարցում, թե Ռուսաստանից սովորելու շատ բան ունենք ու հակադարձեց. «Դա նույնն է, ոնց որ կառլիկը սովորի մամոնտի կռվելու ձևը: Ռազմական հարցում մենք ռուսից սովորելու բան չունենք: Ռուսաստանը մեզ ոչ թե ռազմաբազա, այլ ֆորպոստ է նշանակել: Մենք ՌԴ-ի պոչում ենք, բայց չպետք է թույլ տանք, որ այդ պոչով փոշի սրբի, որ կողմն ուզի»:
Տաթև ՀԱՐՈՒԹՅՈՒՆՅԱՆ
